Condenan a unha sucursal de Unicaja en Vigo por cláusulas solo abusiva nunha hipoteca

A demanda, tramitada polo despacho Oulego Avogados e Consultores, referíase a un contrato asinado en 2005. Segundo a resolución, a cláusula imposta limitaba artificialmente a baixada dos intereses, o que supuxo para o consumidor un pago excesivo durante anos. O fallo tamén obriga á entidade a abonar os intereses legais correspondentes a cada un dos cobros indebidos.

O xuíz conclúe que o banco non achegou probas suficientes que acreditasen que o cliente foi debidamente informado nin que a cláusula fose negociada. Esta falta de transparencia e o desequilibrio xerado no contrato hipotecario reforzan o seu carácter abusivo e, por tanto, a súa nulidade, explica o despacho.

Doutrina consolidada en defensa do consumidor

A decisión do xulgado vigués alíñase coa doutrina fixada tanto polo Tribunal Supremo como polo Tribunal de Xustiza da Unión Europea. Ambas as institucións coinciden en que a opacidade destas cláusulas supón unha alteración inxusta do equilibrio contractual en prexuízo do consumidor, o que infrinxe os principios de boa fe.

O Tribunal Supremo, en distintas resolucións ditadas nos últimos anos, consolidou un criterio claro: a mera ausencia de transparencia na incorporación de cláusulas solo nos contratos hipotecarios constitúe, por si soa, unha causa suficiente para declarar o seu carácter abusivo. Esta postura baséase na constatación de que, ao non proporcionar ao consumidor unha información comprensible e completa sobre as consecuencias económicas da cláusula, vulnéranse os seus dereitos e rompe o equilibrio entre as partes do contrato. Esta interpretación garante ao afectado o dereito a recuperar todas as cantidades pagas de máis, sen limitación temporal.

Ademais, o fallo inclúe a condena a Unicaja ao pago das costas xudiciais, o que implica que o cliente non terá que asumir ningún gasto relacionado con avogados nin procuradores, sumando unha vitoria completa para o demandante.

As cláusulas solo foron obxecto dun amplo número de litixios nos últimos anos. Aínda que moitas entidades cesaron no seu uso, os tribunais continúan ditando resolucións que permiten aos afectados recuperar o diñeiro pago inxustamente.

Esta sentenza, que confirma a tendencia xudicial en defensa do consumidor, súmase a outras similares que veñen consolidando un escenario favorable para quen deciden reclamar fronte a condicións contractuais desequilibradas e impostas sen transparencia.