O PPdeG asegura que presentarán mocións nos municipios galegos polo atraso de trens Avril

A secretaria xeral do conxunto azul reclamou polo atraso dos trens Avril que permiten viaxar a alta velocidade.

"Sánchez perdeu o tren da confianza de todos os galegos", sentenciaba Paula Prado.

Pola outra parte, a ministra de Transportes afirmo a intención de Renfe de sancionar á empresa Talgo polo atraso de chegada dos trens.
 

A secretaria xeral do PPdeG, Paula Prado, informou de que os populares presentarán mocións en todos os concellos galegos para esixir que se poñan en marcha os trens Avril, despois de que se confirmou o atraso na súa chegada a Galicia.

En rolda de prensa, Prado recrimina ao Goberno que "non busquen escusas onde non as hai" sobre o atraso dos trens Avril -que supoñería levar a alta velocidade ao Eixo Atlántico- e reclama que "asuma a súa responsabilidade". "Sánchez perdeu o tren da confianza de todos os galegos e galegas", sentenza.

Remarca que "a alta velocidade, efectivamente, chegou a Ourense, pero ten que chegar a toda Galicia canto antes", ademais da modernización da liña a Lugo e Ferrol. Lembra que había un compromiso de que os trens Avril chegase no verán á comunidade galega, pero "o único que chegou foi un comunicado de Renfe" no que recoñece que non será posible.

"Agora descubrimos o que xa sabiamos, que non se trataba dunha cuestión prioritaria para o Goberno central". "Agora chega o momento de buscar escusas rápidas, discusións entre Renfe e Talgo, que, por suposto, non nos convencen", reproba.

A secretaria xeral do PPdeG quéixase de que se trata de "unha nova falta de respecto institucional a Galicia", mentres deixa claro que os galegos "se merecen unha explicación".

"Galicia non pode perder o tren da alta velocidade e facelo por culpa dun Goberno sen rumbo que non cumpre as súas promesas. Esixímoslle a Sánchez que non deixe descarrilar a nosa competitividade, poña en funcionamento os trens Avril e sitúe o transporte ferroviario galego no século XXI", afirma Prado.

A ministra de Transportes, Raquel Sánchez, anunciou esta semana a intención de Renfe de penalizar á empresa Talgo polo incumprimento do contrato para a chegada destes trens.

Precisamente, Talgo recoñeceu que había "determinados atrasos" nos prazos de entrega durante o transcurso do proxecto xerados principalmente "por causas de forza maior", entre eles as caídas de produción e interferencias na cadea de subministración con motivo da covid-19 e outros "eventos xeopolíticos".

REUNIÓN DE RUEDA CON SÁNCHEZ
Por outra banda, Prado reprobou como unha "falta de respecto institucional" que o presidente da Xunta, Alfonso Rueda, tivésese que decatar por "unha entrevista radiofónica" de que será recibido este mes polo titular do Goberno central, Pedro Sánchez, no canto de ser "a través de resposta oficial".

De tal forma, Prado demanda o "debido respecto" para Galicia e que atenda a diferentes reclamacións relativas a: a transferencia da xestión do litoral, solucións viables ante o derrube do viaduto da A-6, marcha atrás na proposta de eliminación de 1.300 servizos de bus de liñas estatais, así como sobre os fondos Next Generation e no campo sanitario.