O PSOE volve estar por diante do PP en Galicia por segunda onda consecutiva de 40db

De feito, no último desglose galego do barómetro mensual de 40db para unhas eleccións xerais, o PPdeG non só volve ser superado polo PSOE senón que tamén o BNG písalle os talóns.

Así, os conservadores quedan en segunda posición cun 19% de intención de voto, que está no rango baixo da súa pinza habitual, que se adoita mover entre, aproximadamente, o 20% e o 30%. 

O PP sobe levemente neste barómetro en Galicia e tamén en España, onde encabeza a sondaxe con máis do 31% de intención de voto. Hai que ter en conta tamén que hai moito voto oculto na enquisa, case un 17%, e que no país o voto oculto adoita ir case todo cara aos conservadores.  

O repunte do PP nesta onda pódese explicar, polo menos en parte, porque o seu principal competidor directo, Vox, mostra indicios de estar a tocar teito. 

É máis, a súa curva na estatística estatal baixa por primeira vez no medio ano. Parece que as pelexas internas están a pasarlle factura aos de Santiago Abascal, que perden unha décima a nivel español respecto da anterior onda e case un punto a nivel galego. Cun 9,6% de intención de voto a repartir entre as catro provincias do país, a ultradereita teríao moi difícil para conseguir algunha acta por Galicia.

O #PSOE, pola súa banda, mostra un lixeiro repunte nas enquisas nos últimos meses, quizais á calor da oposición ás políticas de Donald Trump, en particular a clara aposta de Pedro Sánchez contra a guerra de Irán. 

Na autonomía, aínda que baixa sete puntos fronte aos seus extraordinarios números da onda anterior, o que era esperable dado o excepcional daquelas cifras e a gran volatilidade da enquisa de 40db en Galicia debido ao reducido da súa mostra, o PSdeG segue de primeiro, con máis dun 26% de intención de voto. De feito, é o segundo barómetro consecutivo no que encabeza as enquisas, algo que non se viu nos últimos tempos.

A boa serie dos socialistas galegos nas últimas ondas non parece que se estea producindo a costa do #BNG. Os de Ana Pontón conseguen o 18,9% en intención de voto e acumulan tres mensualidades á alza. 

Aínda que non logran romper o seu teito, que parece estar en torno ao 20%, os nacionalistas galegos apuntan a que poderían conseguir, polo menos, unha segunda acta de deputado en Galicia, seguramente por Pontevedra.  Agora mesmo só teñen unha na Coruña.

A vítima destas alzas socialista e nacionalista é a atomizada esquerda rupturista de ámbito estatal. Tanto Sumar como Podemos seguen cultivando por separado cifras paupérrimas, 3,6%e 3,3% en Galicia respectivamente. Con estas vimbias, nin sequera se lograsen un improbable acordo de coalición terían opcións de competir por unha acta nalgunha das catro provincias. 

A nivel estatal, ambas as forzas tamén sofren caídas nesta onda. Sumar móvese na contorna do 5%, que podería para ter unha representación de escanos mínima, e Podemos en torno ao 3%, que os expulasaría do Congreso.  A súa desunión é un dos factores que explica porque na maioría das enquisas a dereita parece ter asegurado chegar a Moncloa.

Outros que non levantan cabeza son os de SALF. Os de Alvise andan polo 2,6% de intención de voto en Galicia, que en todo caso sería un punto máis do que terían no conxunto de España.