O bloqueo de dereita e ultradereita birla 400 millóns millóns a Galicia, alerta o PSdeG
Non se poden aprobar orzamentos sen teito de gasto, pero este trámite acaba de ser tombado por PP, Vox e Junts no Congreso. O líder socialista galego advirte que a consecuencia de que España non teña orzamentos para 2025 sería que Galicia recibise menos diñeiro do que necesita para manter os seus xa presionados servizos públicos.
O secretario xeral do PSdeG, José Ramón Gómez Besteiro, reprochou ao PP que a falta de apoio á senda de estabilidade dos orzamentos do Estado proposta polo Goberno central fai que Galicia deixe de percibir 400 millóns. "Unha vez máis, Feijóo e Rueda sáennos caros aos galegos", sostivo.
Hai que lembrar que o Pleno do Congreso rexeitou os obxectivos de estabilidade orzamentaria e de débeda pública para o conxunto das administracións, con 178 votos en contra, 171 a favor e ningunha abstención.
En declaracións aos medios antes de participar no acto de entrega das Medallas de Galicia, Besteiro criticou a decisión dos populares de evitar a aprobación dunha medida que "terá graves consecuencias para a comunidade". "Galicia vai deixar de percibir máis de 400 millóns de euros entre o 2024 e o 2026".
O xefe de filas do PSdeG sostivo que o PP bloquea "unha vez máis" outra iniciativa que beneficia ao conxunto da cidadanía, como ocorreu coa redución do IVE aos produtos básicos.
"Agora, a perda de fondos vai ir directamente contra os servizos públicos", asegurou antes de insistir en que "cada decisión que toman Feijóo e Rueda para opor a todo o que fai o Goberno de España ten consecuencias malas para os galegos e galegas", dixo.
Pola súa banda, a secretaria xeral do PP, Cuca Gamarra, asegurou que é "#insosteible" a situación do xefe do Executivo, Pedro Sánchez, tras "perder votacións" no Congreso e emprazoulle a facer unha "reflexión" porque, ao seu xuízo, debe entender que "terminou o seu tempo" e os españois merecen "outro Goberno". Neste escenario, indicou que o líder do seu partido, Alberto Núñez Feijóo, anunciará este mércores as medidas que "deben levar a cabo" se Sánchez "non dá un paso á fronte".
A secretaria xeral de Podemos, Ione Belarra, manifestou que a deriva do Goberno é un "desastre", tras o rexeitamento do Congreso aos obxectivos de estabilidade orzamentaria e a reforma da Lei de Estranxeiría, e proclamou que a "lexislatura progresista queda literalmente enterrada".
Escribe o teu comentario