Un incendio calcina tres vivendas en Rubiá

Un incendio deixou tres casas calcinadas case na súa totalidade en Rubiá, polo momento non se puideron esclarecer cal foi a causa do lume.

Segundo indicou o 112 Galicia, rexistrou varios avisos por mor deste incendio, o primeiro deles ao redor das 22,20 horas, nos que alertaban de que estaba a arder unha casa na Veiga de Cascallá, con posibilidade de que houbese xente no seu interior.

Os xestores do 112 Galicia avisaron ao Servizo de Urxencias Sanitarias de Galicia-061 e aos Bombeiros e ao GES de Valdeorras, así como á Garda Civil, que se mobilizaron até a zona.

Despois de que os servizos de emerxencias acudisen até o punto, estes indicaron que o incendio estaba descontrolado, pois o lume xa afectaba a dúas casas. Polo que se solicitou tamén a intervención dos Bombeiros de Monforte e dos de Verín, así como do GES de Quiroga e tamén acudiu persoal de Medio Rural, que achegou unha motobomba.

Con todo, as chamas acabaron por afectar até a tres casas, todas de madeira, que arderon completamente. Ademais, un dos bombeiros da dotación de Valdeorras tivo que ser trasladado até o hospital polos seus compañeiros, despois de que sufrise danos ao caer unha viga.