Arden seis hectáreas do parque natural Baixa Limia-Serra do Xurés nun incendio xa extinto (vídeo)
Na parroquia da Illa en Entrimo xa houbo un importante incendio en 2016. Nesta ocasión os servizos de emerxencia lograron controlalo e apagalo antes de que se desbocase por completo.
A Consellería do Medio Rural informou de que o incendio forestal rexistrado este pasado xoves no concello ourensán de Entrimo quedou extinguido minutos antes das 00.00 horas desta noite.
Nun comunicado, a Xunta explica que o lume comezou na parroquia da Illa a sobre as 17.45 horas e, segundo as últimas medicións, afectou a unha superficie de seis hectáreas dentro do Parque Natural Baixa Limia-Serra do Xurés, das cales cinco eran de monte arboledo e unha de raso.
Na extinción deste incendio colaboraron dous axentes, sete brigadas, tres motobombas, dous helicópteros e un avión, segundo indica o Goberno galego.
A Consellería do Medio Rural lembra que está a disposición da cidadanía o número de teléfono gratuíto 085, ao que deben chamar en caso de detectar algún lume forestal. Ademais, existe un teléfono anónimo para denunciar calquera actividade delituosa incendiaria da que se teña sospeita ou coñecemento: 900 815 085.
![Incendio en Entrimo O Xuru00e9s en una foto de Incendios Galicia Twitter](/multimedia/images/6748860.png)
Escribe o teu comentario