Os encontros dos Consellos Escolares Autonómicos e do Estado celebraron as súas vodas de prata en Galicia; e Santiago de Compostela foi a cidade elixida para este evento de tres días. A “Consellería de Educación, Ciencia, Universidades e Formación Profesional”, a través do Consello Escolar de Galicia, exerceu como anfitrioa e dinme os máis críticos, que deron a talla, elevando o listón de altura en canto a calidade, organización e participación.

Desde a creación dos Consellos Escolares, os diferentes sectores da comunidade educativa están ben representados. Son máis visibles. No entanto, a súa influencia nas políticas educativas transferidas do Estado, estaban case sempre en función da vontade do goberno autonómico. O grao de implicación dos Consellos, de carácter consultivo, sempre dependía da dinamización do seu presidente respectivo e a participación, que enriquecía os ditames que se aprobaban nas súas sesións plenarias, comezaba a escasear. Con todo, desde o Consello Escolar do Estado detectaron que a participación non está a pasar os seus mellores momentos e este encontro levou a lema “Cando a túa participación xera benestar”. Encarna Conca, que preside o Consello Escolar do Estado, pedía crear un ambiente positivo, onde o discurso do ego sexa moi escaso e no que a participación busque ese estado de confort óptimo:” Porque é común o aire que respiramos”.

Pola súa banda o presidente do Consello Escolar de Galicia, Román Rodríguez, destacou a importancia de pór en valor o papel dos Consellos Escolares como pezas crave na toma de decisións por ser representantes de toda a comunidade educativa. E este compromiso público compromételle, pois é precisamente aquí onde está o xiro positivo da Xunta de Galicia en materia educativa. Haberá que esperar a que todo dea o seu froito, é certo, no entanto, os acordos coa maioría dos sindicatos non se fixeron sen participación e sen diálogo e as críticas destrutivas que tivo que soportar, nin crean bo ambiente nin son un camiño para avanzar. Román rodeouse dun equipo de directores xerais moi competentes, plurais e traballadores que estiveron presentes e activos en varias sesións do XXV Encontro, coa meta de participar na elaboración dunha guía con 34 accións xerais clasificadas en Ecosistemas (formal, informal e comunitario), cos seus ítems que os desenvolven, e teñen ademais tres dimensións (formación do alumnado, estruturas de participación e normas de participación). Esta guía de consellos escolares que fomenta a participación do alumnado, será elaborada coas achegas de todos os acentos, linguas, idiosincrasias e matices recolleitos en todos os recunchos do Estado. Estou seguro que será un éxito, como o foron as dinámicas participativas levadas a cabo por Adrián Soto e Eva Nieto da Universidade Complutense de Madrid entre os asistentes; porque cada persoa é única, e integrar nun colectivo, non é sinxelo para todos.

Só réstame felicitar a todos os participantes destacando o papel do vicepresidente do Consello Escolar de Galicia, Manuel Corredoira que, nun emotivo discurso de clausura, agradeceu ao alumnado asistente o seu grao de participación, pondo de manifesto o seu compromiso de dinamizar o Consello Escolar de Galicia, que proximamente cumprirá os seus 40 anos.