Atrifoga demanda ampliar a doce meses o traballo dos fixos-discontinuos que están a nove

A Asociación de Traballadores/as de Incendios Forestais de Galicia (ATRIFOGA) reclama á Xunta de Galicia cambios nas condicións de traballo dentro do persoal para extinción e prevención de incendios forestais.

As reivindicacións de ATRIFOGA pasan pola ampliación a doce meses de contrato para aquel persoal fixo-discontinuo que actualmente traballa nove meses. Ademais, tamén reclaman a formación continua e dotar de recursos necesarios a todos e todas as traballadoras para garantir a continuidade do traballo preventivo todo o ano.

Tamén consideran de urxencia cubrir as prazas creadas en 2019 ademais de todas as vacantes existentes do servizo derivadas do proceso de estabilización da Lei 20/21. Isto axilizaría o proceso de profesionalización do servizo contraincendios da Xunta.

Atrifoga considera necesarios estes cambios ante a vaga de lumes de quinta e sexta xeración motivados, en parte, polo cambio climático ademais da acumulación de masa forestal. Así mesmo, lembran que, con anterioridade, xa se aprobara a ampliación dos contratos de fixos-discontinuos pasando algúns de tres a seis meses e finalmente a nove meses de traballo.
 

É por iso que agora reclaman a ampliación a doce meses de contrato ao persoal de nove meses para facer fronte aos grandes lumes. Así, o dispositivo contraincendios estaría reforzado e cuberto na súa totalidade durante os doce meses do ano. Isto implicaría a posibilidade de aumentar os traballos de prevención durante todo o ano para evitar dentro do posible, unha vaga de lumes como os que afectaron a Galicia este verán.