Hostaleiros de Santiago volven rexeitar o novo servizo de recollida de lixo do Concello

A Asociación Hostalaría Compostela expresou este venres, despois dunha reunión dos socios, o seu desacordo cos horarios e o servizo de recollida de lixo que propón o Concello de Santiago.

A proposta enviada pola concellaría responsable consta dun plan de recollida para os residuos orgánicos e fracción resto a partir das 23:30 horas de luns a venres e das 24:00 horas os fins de semana, papel e cartón desde as 20:30 horas, envases lixeiros desde as 20:00 e vidro da mesma maneira que vén facendo.

Segundo os hostaleiros, os horarios que se propoñen "non se adaptan ao traballo" do seu sector nin "á vida social de Compostela", á vez que as frecuencias de recollida "non son as axeitadas para o volume de lixo que se xera".

Apuntan, ademais, que os colectores "non son os apropiados". Como, por exemplo, explicou que "as garrafas nas que veñen moitos dos produtos de hostalaría nin sequera caben neles", indican desde a asociación, que pediu que se teñan en conta as particularidades "diversas".

A reunión concluíu coa decisión de que seguirá activa a mesa de traballo proposta pola Asociación Hostalaría Compostela, aberta a todo o colectivo. "Esperamos que este esforzo teña os seus froitos por lle benestar do planeta, dos nosos equipos e dos veciños", dixo o presidente, Thor Rodríguez.
 

"SOPRENDIDA E DECEPCIONADA"

Ante este comunicado, a concelleira de Medio Ambiente de Santiago, Mila Castro, mostrouse "sorprendida e tristemente decepcionada" ante a negativa da asociación ao actual horario de recollida de lixos, para a que, asegurou, chegouse a un acordo "adaptando os horarios ao que eles mesmos pediron".

O inicio do novo sistema de recollida de lixo para os locais de hostalaría comezará nos próximos días cun modelo "porta a porta". Para informar os hostaleiros do cambio realizáronse "varias reunións", apuntou Mila Castro. "En toda elas houbo sintonía e consenso", apuntou a edil.