A Mesa recorre ante o TSXG a prohibición de protestar na Toxa en defensa da lingua durante o 'Foro La Toja'

O Goberno de España, amparado nun informe da Garda Civil, prohibiu o pasado venres a manifestación da plataforma en defensa da lingua de Galicia. 

Agora, A Mesa traslada a protesta pola "deturpación do nome" ao paseo marítimo do Grove. Pedro Sánchez, Alfonso Rueda ou Felipe VI acudirán ao Foro. 
 

A Mesa pola Normalización Lingüística presentou recurso ante o Tribunal Superior de Xustiza de Galicia (TSXG) contra a decisión de prohibir a manifestación "contra a deturpación do nome da  Toxa na cuarta edición dun foro que conta con recursos e representantes públicos".

Así o informa nun comunicado e relación ao encontro que terá lugar no Grove. Segundo a resolución de a Subdelegación do Goberno en Pontevedra, esta protesta podería "afectar a orde público" e á "seguridade de persoas e bens", coincidindo coa apertura deste evento a cargo do rei Felipe VI, entre outras autoridades.

TRASLADO

A Mesa explica que "sen prexuízo da decisión que poida tomar finalmente o TSXG" mantén a convocatoria "trasladándoa ao paseo marítimo do Grove, á altura da confluencia entre a rúa Castelao e Beiramar".

Ademais, explica que xa se dirixiu tamén a todos os representantes de institucións públicas que confirmaron a asistencia ao Foro, "reclamándolles que insten á organización para empregar a única forma lexítima e oficial do topónimo".

"Rexeitando calquera presenza no foro mentres non garantan o cumprimento da lexislación que ampara o uso da lingua galega", engaden.

Entre os representantes públicos, está prevista tamén a asistencia do presidente do Goberno, Pedro Sánchez, e o da Xunta, Alfonso Rueda, "que amparan deste xeito o incumprimento da lei e o desprezo pola lingua e cultura galegas", sostén A Mesa pola Normalización Lingüística.