O alcalde de Friol xustifica a oferta de 6.000 euros de recompensa para quen atope ao veciño desaparecido

Case tres semanas despois da súa desaparición o paradoiro de José Luís Iglesias segue sendo un misterio, a pesar das moitas batidas realizadas na zona. 

Neste punto, o Concello de Friol e a familia do desaparecido ofrecen 6.000 euros para a persoa ou persoas que atopen ao octoxenario: "A idea é meter zume novo, e meter xente con novos ollos".

O alcalde de Friol, José Ángel Santos, xustificou a recompensa de seis mil euros a quen dea co paradoiro de José Luís Iglesias, o octoxenario do que non se sabe nada desde o pasado catro de setembro e que reside na parroquia de Carballo.

Santos precisou que isto "supón dalgunha maneira activar o operativo de forma distinta para darlle outra perspectiva con esta recompensa económica, metendo zume novo, incluso incorporando a xente profesional que está especializada nestes casos".

"Despois de máis de dúas semana de intensa procura sen atopar pistas, nin indicios, para a familia é moi duro e triste. Desde o Concello só quédanos apoiar á familia", sentenciou.

Non dubida que "nestes momentos a sorte é un factor importante", para dar con José Luís Iglesias que foi visto por última vez na parroquia de Condes por un transportista.

SEN NOVIDADES

De momento non se produciu ningunha chamada, aínda que o alcalde deFriol incidiu en que "a idea é meter zume novo, e meter xente con novos ollos que vexan o que nós igual non vimos ata o de agora".

Ademais, a partir deste intre, se "acoutará o radio de acción" no rastrexo, que se foi "ampliando, pero si que é certo que o temos que acoutar porque se non hai novas pistas, as estatísticas dinnos que, nestes casos, adoita estar preto de onde foi a última vez que se lle viu".

A recompensa de seis mil euros asúmena tanto o concello de Friol como os fillos de José Luís Iglesias.