A primeira terma adaptada para persoas con mobilidade reducida en España está en Punxín, Ourense
O presidente da Deputación de Ourense, Luís Menor, aproveitou este martes para destacar ao termalismo como un "recurso estratéxico" para a provincia de Ourense, así o asegurou durante a inauguración da primeira piscina termal ao aire libre adaptada e accesible de España, situada en Punxín.
Alí, destacou a "estreita colaboración" coa Xunta e referiuse á cooperación como "clave" para levar a cabo este proxecto termal, executado a través do Plan de Sustentabilidade Ourense Termal e cofinanciado ademais da Deputación de Ourense pola Axencia de Turismo de Galicia e a Secretaría de Estado de Turismo.
"Non inauguramos unicamente unha piscina, senón unhas melloras que supoñen un valor engadido para un concello como Punxín e para unha provincia termal como Ourense", sinalou Menor. Pola súa banda, o rexedor, Manuel Vázquez, referiuse ao "esforzo feito durante décadas" polo Concello para pór en marcha a área termal.
Segundo detallou nunha nota de prensa, a Deputación investiu preto de 37.000 euros co obxectivo de "ofrecer servizos adaptados as persoas con mobilidade reducida e instalar un sistema de tratamento das augas residuais xeradas durante a limpeza das piscinas".
A actuación da piscina termal inclúe tamén a disposición dunha cadeira de rodas feita con materiais plásticos para meter na auga e evitar a súa oxidación.
Escribe o teu comentario