(VÍDEO) Un gran lobo sorprende aos operarios durante os labores de roza en Vimianzo

O animal xurdiu de entre a maleza para sorpresa dos traballadores, que viron como se afastaba a escasos metros de onde realizaban o seu labor.

Os incendios que este verán están a arrasar Galicia non só están a acabar coa vida de moitos exemplares, senón que os sobreviventes quedan sen o seu hábitat e buscan un novo refuxio. 

Unha tranquila -e dura, como o son todas- xornada de roza e clarexo converteuse dun momento para outro nun día de observación da fauna salvaxe de Galicia. Son moitas as especies que poboan os nosos montes, pero moi poucas tan impoñentes como o lobo ibérico, e máis se nos referimos a un exemplar tan grande como o que se paseou preto dos operarios que traballan en Vimianzo.

As imaxes, publicadas polo doutor  Enxeñeiro de Montes, profesor de Botánica Forestal, Micoloxía e Conservación de Flora ameazada Juan Andrés Oria de Rueda de Salgueiro, tomáronse, ao parecer, en Vimianzo, durante os labores de roza e clarexo nunha plantación de eucalipto. 

“As plantacións de eucaliptos son moi visitadas polos lobos, que poden transitar e refuxiarse con facilidade”, sinala o docente. Talvez asustado polo ruído das maquinas, o animal, despois dunha rápida ollada, volveu perderse entre as árbores.

INCENDIOS EN GALICIA

É posible que nalgúns puntos da comunidade haxa que afacerse a esta clase de interaccións. Os incendios que arrasan Galicia este verán están a destruír o hábitat de decenas de mandas. Nalgúns casos, os animais quedan cercados polo lume e perecen ante as chamas. Noutros, os animais sálvanse pero non teñen lugar ao que regresar, xa que o terreo xa non ofrece as condicións para cazar ou resgardarse dos humanos. 

En paralelo, a Xunta segue na súa cruzada xunto ás outras tres comunidades loberas -Asturias, Cantabria e Castela e León- por tombar a protección do lobo ibérico na estratexia de conservación da especie aprobada polo Goberno de España e á que se opón o Goberno de Galicia, que considera a medida lesiva para os seus intereses económicos. Unha postura que espertou moitas críticas entre as organizacións animalistas.

De calquera forma, agora o que cabe é preguntarse que vai pasar con todas esas mandas desprazadas polo lume. Segundo os datos da Fundación Franz Weber, o lume dos últimos días podería acabar con 40.000 animais, segundo un estudo de modelos preditivos do catedrático Christopher Dickman, da Universidade de Sidney (Australia).
 

Os cálculos de Dickman teñen como base a vaga de incendios que sufriu Australia durante 2020, estimando que en cada hectárea de monte existen entre 10 e 15 animais de especies diferentes que conviven. Desta forma, a cifra aproximada para estes recentes lumes en Galicia cren que é "extremadamente conservadora", debido a "as dificultades para coñecer con exactitude o número de invertebrados e pequenas especies".

O que si é unha certeza é que o dano ecolóxico e ambiental é incuantificable, xa que non só especie protexidas como os lobos puidéronse ver afectadas, senón tamén poboacións de cabalos semisalvajes ou mesmo aves. 

Nesta liña, a Fundación demanda que as medidas de restauración dos ecosistemas 

afectados teñan en conta o perigo que supón a caza para os animais sobreviventes. Así, reclaman a prohibición atemporal da caza en terreos adxacentes ás chamas.