Máis de 3.400 alegacións contra o proxecto dunha macroplanta de biogás ligada a Ence na Limia

A Plataforma Macroplanta Biogás na Limia NON completou este xoves o rexistro de máis de 3.400 alegacións contra a instalación en Xunqueira de Ambía dunha industria de produción de combustible a partir de residuos impulsada por Ence.
 

Segundo informou a propia organización, esta cifra triplica o número de escritos que se reuniron nas comarcas da Limia, Allariz-Maceda e Terras de Celanova o pasado mes de novembro, cando se produciu "o primeiro intento de tramitar o proxecto, que a Xunta decidiu cancelar en canto deuse conta dos erros na documentación presentada pola promotora".
 

"Agora, despois dunha intensa campaña de cinco meses, con mesas informativas en feiras e mercados, charlas, difusión en redes sociais dos principais impactos da instalación, e 31 puntos de recollida (nos municipios de Xunqueira de Ambía, Sandiás, Allariz, Xinzo de Limia, Maceda, Vilar de Santos, Vilar de Barrio, Celanova e Ourense, a plataforma considera que quedou de manifesto a inquietude de veciños e veciñas ante unha macroindustria destas dimensións, e esixe a paralización do proxecto, denegando os permisos que solicita Ence", expoñen nun comunicado.
 

Entre os "impactos", a plataforma denuncia "riscos de verteduras de residuos líquidos", que a promotora "non aclara como se van a xestionar", e alerta das consecuencias dunha planta deste tipo (que leva asociada unha planta fotovoltaica e outras infrarestructuras eléctricas) nun lugar próximo á ZEPA da Limia, así como da "ameaza para a saúde humana" polas emisións.

Ademais, denunciaron "o interese puramente lucrativo" de Ence, que "elixe o enclave máis rendible pola situación do gasoduto, pasando por encima das evidentes afeccións ambientais e sobre a saúde das persoas nunha área densa en núcleos de poboación".
 

Finalmente, a plataforma lembrou que, ademais de persoas e colectivos diversos, tamén varios gobernos locais han presentado alegacións, e apuntaron que, tras a fase de participación pública, o procedemento entra en fase de avaliación da documentación. "Nesta fase, a plataforma prepara novas accións ante as administracións implicadas", explicaron, e aludiron especificamente á Confederación Hidrográfica Miño-Sil, que "terá moito que dicir en canto ás ameazas que representa o proxecto para as augas, xa moi castigadas, da Limia".