Folga case total en UNVI Ourense (Pérez Rumbao) ante o bloqueo do convenio colectivo

A práctica totalidade do persoal de UNVI, a empresa de carrozarías situada no polígono de San Cibrao das Viñas e vinculada ao Grupo Pérez Rumbao, secundou a primeira das tres xornadas de folga convocadas polo comité de empresa en protesta polo estancamento nas negociacións do convenio colectivo e pola intención da compañía de modificar o calendario laboral. O persoal denuncia que o cambio suporía a perda das tres semanas de vacacións consecutivas de agosto, un costume histórico na factoría ourensá.

Desde primeiras horas da mañá, piquetes informativos concentráronse ante as instalacións sen incidentes reseñables. A produción quedou totalmente paralizada nas quendas de mañá e tarde, o que os sindicatos CIG e CUT cualificaron de “éxito rotundo” de participación e mobilización.

Manifestación polo centro de Ourense

A xornada de paro incluíu unha manifestación que percorreu as rúas do centro de Ourense, desde a Casa Sindical até a Subdelegación do Goberno. Centenares de traballadores e traballadoras lanzaron consignas en defensa dun convenio colectivo “xusto” e dun calendario laboral acordado coa representación social.

Desde o comité de empresa, formado por catro representantes da CIG, tres da CUT e dúas da UXT, sublíñase que tras tres reunións coa dirección non houbo ningunha proposta concreta por parte da empresa, o que motivou a convocatoria doutras dúas xornadas de folga os días 10 e 11 de decembro. Os representantes sindicais reiteran que o persoal se mantén unida e disposta a continuar coas mobilizacións se persiste o “bloqueo” patronal.

UNVI (Unidades Vehiculares Industriais) é a principal carrocera de Galicia e unha das máis importantes do Estado na fabricación de autobuses e microbuses personalizados, con ao redor de 250 empregados na súa planta de Ourense. A firma, integrada no Grupo Pérez Rumbao, exporta boa parte da súa produción a Europa e Latinoamérica e nos últimos anos participou en contratos de subministración de vehículos eléctricos de transporte urbano, un mercado en expansión dentro da transición cara á mobilidade sostible.

A pesar deste crecemento, as organizacións sindicais advirten que o bloqueo na negociación do convenio afecto directamente ás condicións económicas e familiares do persoal. As centrais sinalan que o diálogo coa empresa non avanzou a pesar dos intentos de mediación, mentres que desde UNVI non se emitiu comunicación pública que explique as razóns polas que non se presentaron propostas nin os motivos do cambio do calendario de vacacións.

Sábado de protesta conxunta

Á folga deste xoves sumarase unha protesta este sábado 29 de novembro, convocada por CIG-Industria Ourense nas inmediacións do establecemento de Leroy Merlín coincidindo cun salón de vehículos de ocasión organizado polo propio Grupo Pérez Rumbao. Nesa mobilización está prevista a participación conxunta de traballadores do sector siderometalúrgico, que tamén reclaman un convenio provincial digno.

De manter o inmovilismo empresarial, os sindicatos anuncian que intensificarán o calendario de mobilizacións nas próximas semanas.