As fábricas de Atunlo no Grove e Cambados pasan a mans do Grupo Coper

A empresa Mare, do Grupo Coper (Comercial Pernas), adquiriu a empresa especializada en atunes Atunlo O Grove, tras a sentenza xudicial do Xulgado Mercantil N.3 de Pontevedra emitida o pasado mércores e por un prezo estimado que supera o millón de euros.

A sentenza autoriza, ademais da transmisión do 65% de Atunlo, a toma de control de Frigoríficos de Cambados, propiedade da primeira e que á súa vez posúe o 50% da planta Central Lomera Portuguesa.
 

O prezo que resulta da oferta presentada por Mare para a adquisición do 65% da sociedade Atunlo O Grove, comprende, segundo a sentenza á que tivo acceso Europa Press, 500.000,00 euros "pagadoiros de forma aprazada ou fraccionada", máis "o 40% do prezo obtido pola transmisión do 50% das participacións sociais das que é titular Frigoríficos Cambados respecto do 50% do capital social sobre Central Lomera Portuguesa".

Así, de acordo co auto, o prezo total da oferta fixouse en 1.060.000 euros, dos cales 500.000 euros son os ofrecidos por Pernas por Atunlo O Grove e os 560.000 restantes proveñen da venda de Central Lomera.

O Grupo Coper, unha empresa familiar dedicada á comercialización de peixe conxelado, aposta pola actividade industrial en Galicia e pretende con esta operación "reflotar" as antigas plantas de Atunlo, "grazas ao seu coñecemento do mercado, canles de aprovisionamento e a súa longa experiencia no sector".
 

Comercial Pernas, que asegura contar co apoio de traballadores e sindicatos, mantivo abertas e operativas as plantas de Atunlo, "con todo o que representa para a empresa e os traballadores en canto a emprego e futuro das plantas, así como ao mantemento do servizo para os clientes".

De acordo co grupo, a operación, levada a cabo sen menoscabo no proceso da administración concursal e cumprindo co procedemento, conseguiuse mediante a achega e desembolso de 2,8 millóns de euros ás plantas de Atunlo por parte de Comercial Pernas para obter a aprobación e homologación do seu Plan de Reestruturación.

Coper, que no 2022 facturaba máis de 150 millóns de euros continuou coa súa traxectoria comercializadora, pero se viu obrigada a entrar en reestruturación no 2023 arrastrada polos problemas de Atunlo.

O 12 de agosto de 2025, despois dunha revisión profunda do negocio, asumindo o negocio de Atunlo, e co control das plantas procesadoras -tras achegar 2,8 millóns de euros a estas plantas-, Coper ve aprobado e homologado o seu plan de reestruturación.
 

Este plan baséase na produción en Galicia de lombos e elaborados de atún para o sector conserveiro de alta gama, e elaborados de atún para a distribución e o retail (comerciante polo miúdo en mercados e supermercados), estas dúas últimas gamas de negocio cun forte crecemento desde 2021 en toda Europa.