Licitadas obras de humanización e mellora da accesibilidade do núcelo de Moreiras, en Toén

A Xunta licita por 400.381 euros as obras que completarán a humanización e mellora da accesibilidade do núcleo de Moreiras, no concello de Toén.

A través desta actuación, trátase de crear un conxunto de espazos de lecer en Moreiras, incluíndo un auditorio ao aire libre, con escenario e bancos; a creación dunha zona de pérgolas con mobiliario para convidar o descanso; unha área de xogos infantís e outra onde se instalarán aparellos biosaludables (calistenia) e unha pista multideportiva.

Ademais, dotarase a zona de iluminación e rede de pluviais e completarase con mobiliario urbano.

Os traballos completarán outras tamén financiadas co apoio da Xunta e que permitiron urbanizar unha praza e mellorar a accesibilidade do núcleo de Moreiras.

A Plataforma de Contratos Públicos de Galicia recolle esta licitación, establecendo un prazo de presentación de ofertas que finalizará o próximo 16 de xullo.

Esta nova obra enmárcanse nun convenio de colaboración da Consellería de Vivenda e Planificación de Infraestruturas e o Concello de Toén ao amparo do Plan Hurbe. Baixo este acordo, a Xunta asumirá o 70% do orzamento desta intervención, e o Concello achegará o 30% restante.