Sustentabilidade e economía circular, obxectos da visita a Sogama por parte da CEC

Portavoces de distintas entidades asociadas á Confederación de Empresarios da Coruña (#CEC) visitaron hoxe o Complexo Medioambiental de Sogama en Cerceda. Esta visita realizouse no contexto dun encontro promovido pola CEC, centrado na sustentabilidade e a economía circular.

O grupo, liderado polo presidente da Confederación, Antonio Fontenla Ramil, foi recibido polo presidente da Sociedade Galega do Medio Ambiente, Javier Domínguez. Este manifestou a súa satisfacción polo interese mostrado na actividade de Sogama e por ser elixida como referente en sustentabilidade. Ademais, compartiu cos asistentes a importancia do compromiso co desenvolvemento sostible e a economía circular ante os desafíos actuais, como o cambio climático e a escaseza de recursos naturais.

Fitos e retos de futuro

Durante o encontro, Javier Domínguez explicou os principais fitos históricos da evolución de Sogama. Entre eles destacou a ampliación do complexo cercedense cunha nova planta de recuperación de materiais, aliñada coa industria 4.0. Tamén mencionou a aposta polo ferrocarril como medio preferente para o transporte de residuos, aumentando o seu uso do 25% en 2016 ao 57% na actualidade.

Ademais, Domínguez non deixou pasar por alto a creación dunha rede de instalacións para a compostaxe da materia orgánica, con 4 plantas de biorresiduos e 13 plantas de transferencia de apoio, que supuxeron un investimento de 45 millóns de euros, dos cales 30 millóns procederon dos Fondos FEDER REACT-EU.

En canto aos retos futuros, Domínguez fixo fincapé na transformación dixital, a descarbonización dos procesos, o aumento da reciclaxe, a profesionalización do sector e a xestión de novas fraccións de residuos, como o téxtil. Destacou que a normativa estatal obriga aos concellos a implantar a recollida diferenciada de téxtiles/téxtís a partir do 1 de xaneiro de 2025, así como ás empresas do sector a incorporar unha porcentaxe de fibra reciclada nos seus produtos. Para iso, a Xunta encargou a Sogama a construción e xestión dunha planta de clasificación de téxtiles/téxtís, cun investimento de 25 millóns de euros.

Tras as explicacións, os asistentes realizaron un percorrido virtual polas instalacións do Complexo, acompañados pola directora xeral de Sogama, Mirta Sueiro, completando a visita cun itinerario guiado a pé.