Veciños do Saviñao oponse a un potencial "accidente mediaombiental" no corazón da Ribeira Sacra

No corazón da Ribeira Sacra os veciños do Saviñao levan días preocupados polos rumores, confirmados polo propio Concello local, de que existe un proxecto para a instalación dunha planta de biogás no municipio, onde se reciclarán xurros e lodos de depuradora. O temor a que esta iniciativa poida obrigar a moitos veciños a convivir con cheiros pestilentes provocou un movemento veciñal que xa reuniu en pouco tempo máis de medio milleiro de firmas para este municipio de apenas 3.000 habitantes.  

AFECTACIÓN Ás ESTRADAS, Aos MANANCIAIS, Ao PATRIMONIO...

Segundo a nota que lanzou a Asociación veciñal da parroquia de Vilaesteva, onde avogan "por un Saviñao libre de biogás", a noticia chegou aos seus oídos "de casualidade" cando a alcaldía informou sobre "un tema que vai afectar ás nosas vidas e os nosos cultivos". 

O tráfico polos camións que, proxéctase, traballarán nestas instalacións ou a posibilidade dun "accidente medioambiental en plena Ribeira Sacra" son asuntos que preocupan aos veciños, especialmente aos de Vilaesteva, onde arraiaría esta planta de biogás no lugar de Sanxumil a escasos 200 metros dalgunhas vivendas e a menpos dun quilómetro do núcleo urbano de Currelos, que conta con escola e centro de saúde. No entanto, o colectivo recalca que a actividade da empresa de biogás pode ter consecuencias tamén nas parroquias de Segán, San Vitorio, Chave e os lugares de Castro e Córneas. 

"O Saviñao é un concello eminentemente rural, peroempresas especuladoras e contaminantes queren dificultar a vida e baixar o prezo das nosas vivendas instalando unha central de biogás onde se queimarán xurros e outros refugallos como lodos de depuradora", censura o colectivo veciñal, á vez que puntualiza que esta actividade pode ser especialmente lesiva sobre o manancial que abastece de auga a Sanxumil, "un lugar sen traída municipal de auga", e cuxo caudal acaba desenvocando no río Sardiñeira, afluente do Miño, co risco ecolóxico que leva.

A continuación, advirten que o proxecto pode afectar tamén ao patrimonio do lugar, xa que "a parte alta do terreo está afectada por un conxunto de mámoas que están nunha leira contigua". 

SEN RESPOSTA DO CONCELLO

Os veciños xa trasladaron ao alcalde, o popular Juan Carlos Armesto Quiroga, os seus receos ante este proxecto e a apertura da recollida de firmas online supón un paso á fronte, conscientes de que neste municipio "a poboación é maior e non está actualizada nas novas tecnoloxías". 

Proximamente, anuncian, iniciarán un proceso de recollida de firmas físicas para presentar ante o goberno municipal para que se desestime o proxecto, como xa ocorreu noutras localidades veciñas. Galiciapress tratou, de consultar, sen éxito, os pormenores deste proxecto co Concello do Saviñao, que por agora non respondeu ás nosas chamadas nin ás cuestións que lles trasladamos. 

"Unha central de biogás só trae cheiros e contaminación ao noso ayuntamientou. Véndese como a solución ao problema dos gandeiros e das gandeiras, pero en realidade van traer lodos de depuradora e lodos industriais. Camións cheos de lixo pasando por nosas xa deterioradas estradas a diario e por diante das nosas casas. Realizaremos tantas accións como sexan necesarias para que non se instale unha planta de biogás preto das vivendas", conclúen na súa nota.