Recibirá Altri axudas do Plan de Recuperación? O delegado do Goberno e a conselleira están "expectantes"

Os días pasan sen coñecer os rtesultados da Avaliación Ambiental de Altri, clave para a súa posta de longo, case tanto como o financiamento que pode facer que a factoría programada en Palas de Rei saia adiante ou non. Neste escenario, son moitas as dúbidas en torno ao capital que pode ou non pode recibir a empresa, que de momento aspira a recibir un bo pedazo de pastel no relativo ás axudas públicas, a pesar dos receos de partidos políticos e administracións.

O delegado do Goberno en Galicia, Pedro Blanco, declarou esta mañá que Altri podería optar ás axudas do Plan de Recuperación "como calquera empresa", sempre que "cumpra coas esixencias legais e medioambientais". Branco subliñou que aínda están pendentes os informes medioambientais sobre a instalación en Palas de Rei, polo que é prematuro anticipar unha resolución.

"A empresa será tratada como calquera outra", afirmou Branco, engadindo que poderá concorrer ás axudas se cumpre os requisitos establecidos.

Pola súa banda, a conselleira de Economía e Industria, María Jesús Lorenzana, indicou que é o Ministerio de Industria quen debe decidir sobre as axudas ao proxecto de Altri. Lorenzana lembrou as declaracións da secretaria de Estado de Industria, Rebeca Torró, quen asegurou que o Ministerio está "expectante" ante a avaliación ambiental que realice a Xunta.

OPOSICIÓN POLÍTICA

Algúns partidos políticos móstranse contrarios á instalación de Altri en Palas de Rei. A portavoz de Sumar no Congreso, Verónica Martínez Barbero, manifestou que o seu partido "fará todo o que estea na súa man" para "frear" o proxecto e confía en que non reciba fondos europeos.

Na mesma liña, o líder do PSdeG, José Ramón Gómez Besteiro, tamén expresou a súa crenza de que o proxecto non recibirá financiamento estatal

XUNTA Á espera DA AVALIACIÓN AMBIENTAL

A conselleira  Lorenzana insistiu en que a Xunta está pendente de completar a avaliación ambiental do proxecto. Esta avaliación será clave para determinar a viabilidade da instalación de Altri en Palas de Rei e o seu posible acceso ás axudas do Plan de Recuperación.

O Goberno central, pola súa banda, asegurou que realizará "co máximo rigor" a avaliación para determinar se Altri pode acceder ou non ás axudas do Perte de descarbonización industrial.

A polémica en torno ao proxecto de Altri en Galicia pon de manifesto as diferentes posturas entre administracións e partidos políticos, mentres se espera a resolución dos informes medioambientais que serán determinantes para o futuro da instalación.