A campaña 'Maio Solidario' de Gadis logra reunir máis de 150 toneladas de comida
Ademais dos produtos, a compañía doa case 50.000 euros achegados polos seus clientes durante o mes de maio.
Outro maio máis, o 12º para ser preciosos, Gadis e os seus clientes volveron a superar na meta da campaña 'Maio Solidario' que cada ano trata de facer provisión de alimentos para máis tarde ser doados a entidades que as repartirán entre os colectivos máis necesitados. Nesta ocasión, a firma galega de supermercados colleitou 150 toneladas de produtos de alimentación básicos, que tratarán de" aliviar a situación de vulnerabilidade que atravesan miles de familias de Galicia e Castela e León".
MÁIS DE 100.000 SOLICITANTES DE AXUDA
Ademais dos alimentos, hai que pór o acento sobre os 49.873 euros doados polos clientes desde o 2 de maio até o 1 de xuño, tempo no que se desenvolveu esta iniciativa en máis de 200 establecementos da firma e que agora irán parar ao Banco de Alimentos da Coruña, Ferrol, Santiago, Lugo, Ourense, Vigo, Ávila, León, Palencia, Ponferrada, Salamanca, Valladolid e Zamora.
Melisa Pagliaro, directora de Mercadotecnia e RSC de GADISA Retail, Lucía Santos, coordinadora de RSC, e José Luís Fernández Astray, director de Comunicación, foron os encargados de facer unha entrega simbólica a Manuel Mora, do Banco de Alimentos compostelán na sede central de Gadis.
Esta axuda permitirá encher as despensas das máis de 100.000 persoas solicitantes asistencia nos Bancos de Alimentos, nun momento de especial incerteza económica e no que estas entidades viron aumentar o número de solicitudes. Nesta circunstancia, Gadis puxo en valor a solidariedade dos seus clientes neste tipo de campañas, onde a presenza de voluntarios animou aos donativos, igual que o compromiso do equipo humano dos establecementos.
Nestes doce anos de doazóns do 'Maio Solidario' Gadis fixo entrega de 1,65 millóns de quilos de alimentos e máis de 225.000 euros, axudando desta forma a miles de familias.
Escribe o teu comentario