Empresario de VTC da Coruña aliado con Uber tenta montar sindicato amarelo, denuncia CC.OO.

A central preavisou o arranque do primeiro proceso de eleccións sindicais na compañía, que emprega a unhas 90 persoas, nun contexto no que o conflito por salarios e xornadas segue moi presente no transporte de viaxeiros.

#CCOO sostén que a iniciativa nace despois de que varias persoas traballadoras achegásense á federación coruñesa para pedir asesoramento por presuntos incumprimentos laborais desde o inicio da actividade da empresa. Segundo o sindicato, a creación dunha representación elixida polo persoal era xa unha necesidade porque permitiría defender de forma colectiva cuestións básicas como salarios, descansos e cumprimento de sentenzas. A organización afirma ademais que comunicou legalmente quen serán as candidatas iniciais para protexelas de posibles represalias e reforzar a liberdade sindical.

A denuncia pon o foco nun problema que non é novo nas VTC: a precariedade e a presión sobre as condicións de traballo. No texto remitido por CCOO fálase dun sector con salarios moi próximos ao SMI e de incumprimentos reiterados dos tempos de traballo e descanso, unha queixa que encaixa con outras protestas recentes do transporte de viaxeiros na provincia da Coruña por convenios e soldos. Nese contexto, a batalla pola representación laboral en Corvus Galicia convértese nun caso especialmente sensible para o sector en Galicia.

A acusación sindical

A parte máis dura da mensaxe de CCOO é a súa acusación de que a dirección trataría de promover un sindicato instrumental, o que popularmente se coñece como sindicato amarelo, para alterar a correlación de forzas na empresa. Segundo o sindicato, ese movemento non busca mellorar as condicións do persoal, senón facilitar acordos máis favorables á patronal e peores para o persoal, algo que a organización di observar noutras comunidades autónomas. CCOO insiste en que non pode aceptar unha representación “adulterada” que deixe fose as demandas reais de quen traballan na flota.

A federación tamén subliña que o primeiro proceso electoral en Corvus Galicia nace despois de que varias traballadoras e traballadores acudisen á central por distintos problemas laborais. No seu comunicado, a organización anima ao persoal da empresa a afiliar e organizar para contar cunha voz propia na negociación das súas condicións. A empresa, pola súa banda, non respondeu por agora publicamente ás críticas da central.

Quen está detrás

Corvus Galicia SL constituíuse en febreiro de 2025 e figura con domicilio social en Madrid, aínda que opera de forma activa en Galicia. A ficha mercantil da compañía vincúlaa a actividades de intermediación inmobiliaria, aínda que a súa presenza en Galicia relaciónase coa explotación de VTC. 

O administrador único é Jesús Ramos Fernández, un empresario con traxectoria coñecida no ecosistema do taxi e as VTC. En informacións publicadas en anos anteriores describíuselle como presidente da Cidade do Taxi de Madrid e como ounon dos grandes tenedores de licenzas do sector en España, ademais de socio ou colaborador en negocios vinculados a Uber e a flotas de VTC. Esa dobre presenza, no taxi tradicional e no negocio das VTC, sectores a miúdo enfretados, situoulle de forma recorrente no centro da controversia sectorial.  

É un dos primeiros aliados estratéxicos en colaborar abertamente con multinacionais de VTC como Uber, tanto en Madrid como en Barcelona, operando nutridas flotas de coches de alta gama que compiten ferozmente polos mesmos clientes.

A traxectoria de Ramos Fernández tamén estivo ligada a un armazón mercantil amplo, con varias sociedades asociadas a actividades distintas do transporte, segundo publicacións de prensa económica e rexistros empresariais consultados en anos anteriores. 

En Galicia, o caso engade unha capa máis a un mercado de mobilidade xa tensionado pola competencia entre modelos de transporte, as reclamacións laborais e o debate sobre o papel das grandes compañías na repartición do negocio. CCOO tenta situar aí a súa denuncia: non só como un conflito interno nunha empresa nova, senón como un aviso sobre como se organizan as relacións laborais nunha actividade, o VTC, que crece con rapidez entre queixas de falta de regulación por parte de moitos taxistas.