Monte Neme volve inquietar: desprazamento do noiro reaviva dúbidas sobre a seguridade das balsas

Desde a Consellería de Economía e Industria quixeron rebaixar a alarma indicando que o desprazamento “non supón ningún risco para a seguridade”. Segundo fontes do departamento autonómico, os técnicos xa advertiran que podía producir un movemento deste tipo tras a rotura da balsa. “O deslizamiento era previsible e en certo xeito esperado, dado que durante a inspección realizada o mesmo día 31 observouse unha zona abovedada próxima á bocamina”, sinalaron.

O derrube produciuse nunha parte pecha ao público, situada dentro do mesmo oco mineiro onde se están executando os traballos de restauración iniciados o pasado decembro. A Xunta insiste en que a situación está baixo control e que a inspección técnica posterior non detectou novas fracturas ou riscos de colapso.

A oposición esixe explicacións no Parlamento

A conselleira de Economía e Industria, María Jesús Lorenzana, compareceu este mércores no Parlamento galego, ás 14:25 horas, para responder as preguntas formuladas por PSdeG e BNG sobre as causas do sinistro e a xestión da mina. Tanto socialistas como nacionalistas pediron aclarar as actuacións de restauración executadas desde o incidente de 2014, ano en que se produciu unha vertedura similar que xa motivara fortes críticas pola falta de control ambiental.

As deputadas do PSdeG Patricia Igrexas e Lara Méndez reclamaron información sobre as medidas preventivas implantadas antes do último accidente, mentres que o nacionalista Óscar Insua solicitou concrecións sobre o nivel de responsabilidade asumido pola Xunta de Galicia neste novo episodio.

Unha mina marcada pola polémica ambiental

Monte Neme, símbolo do abandono mineiro en Galicia, arrastra unha longa historia de incidentes medioambientais desde o cesamento de actividade nos anos 80. En 2014, unha das súas balsas xa rompeu, liberando lodos contaminantes que afectaron as canles próximos e activaron un expediente sancionador. Desde entón, o enclave foi obxecto de distintas promesas de recuperación paisaxística que apenas se materializaron.

O actual plan de restauración, promovido pola Xunta e financiado con fondos públicos, busca estabilizar os noiros e selar as galerías para evitar novos episodios. No entanto, os recentes sucesos reabriron o debate sobre a eficacia destas actuacións e a falta dun seguimento técnico permanente en zonas de alto risco geotécnico.

Expertos consultados por distintos medios apuntan á complexidade do terreo e a erosión acumulada durante décadas como factores que dificultan a consolidación da contorna. Colectivos ecoloxistas e veciños de Carballo e Malpica reclaman maior transparencia e participación no proceso de restauración, aínda que polo momento a Xunta non anunciou novas medidas extraordinarias máis aló do control técnico periódico.

Monte Neme, convertido nos últimos anos en destino de curiosos e afeccionados á fotografía pola cor turquesa das súas augas, continúa sendo un símbolo dos retos pendentes na xestión do patrimonio mineiro galego, onde a seguridade e a preservación ambiental seguen no centro do debate.