Aena propón voos a Roma, Praga, Berlín ou Viena para o despegamento do aeroporto de Santiago

2026 será, previsiblemente, un ano de altos voos no aeroporto Rosalía de Castro. En Lavacolla aterrarán na primavera do ano que vén voos procedentes de Nova York, Ámsterdam ou Cork, o tres últimos grandes anuncios no que a rutas internacionais refírese na oferta do aeroporto santiagués, que sufriu un duro mazazo no outono cando Ryanair decidiu pechar a súa base na capital galega, o que supuxo un importante recorte aos destinos que había até ese momento. A tendencia nos últimos anos era de perder presenza, pois cidades como Edimburgo ou Bérgamo saíronse do mapa. No entanto, as últimas informacións sinalan que o aeródromo compostelán podería despegar de novo.

CATORCER NOVOS DESTINOS?

As administracións e autoridades aeroportuarias prometeron traballar para ampliar a oferta e parecen estar nese camiño. Desde Aena deron a coñecer unha listaxe con máis dunha ducia de destinos "potenciais" para que Santiago capte novas rutas e non quede relegado a un segundo plano en detrimento, especialmente, do aeroporto luso de Sá Carneiro. 

Atendendo á demanda e ás oportunidades, transcenderon polo menos catorce aeroportos que resultan interesantes para Santiago, o cal non significa en ningún caso que vaian ser os destinos que se implementen no futuro, xa que depende das aerolíneas que atendan a este reclamo, tendo en conta que serían xa conscientes de que existe un interese en Galicia por que se concrete a oferta para equilibrar a demanda. 

No plano internacional atopamos catro destinos en Alemaña: Berlín, Düsseldorf, Múnic e Hamburgo. Ademais, tamén en Cetroeuropa podemos atopar Praga e Viena como alternativas. 

Xa no Mediterráneo destacan dous países: Turquía, con voos a Istambul -unha opción que xa existiu no pasado na capital galega- e Italia, con frecuencias a Roma e Milán, unha ruta moi frecuentada no pasado -tamén o foi Roma- e a primeira no ranking en canto a demanda, segundo Aena. Tamén hai que mirar ao Levante, co aeroporto de Murcia como ruta. As cidades andaluzas de Xerez e Selecta e a capital aragonesa, Zaragoza, completan a listaxe. 

A pesar de todo, a única noticia realmente tanxible en Lavacolla é a de que Aer Lingus reforzará a conexión directa entre Santiago e Dublín cun enlace adicional para o verán de 2026. Isto supón incrementar a oferta até os cinco voos á semana, que operarán do 30 de maio até o 12 de setembro.