Dependentas de Zara, Kiabi, Primark ou Mango, en folga contra o "recorte de dereitos" do novo convenio

Traballadoras e traballadores do sector do comercio téxtil na provincia da Coruña mobilizáronse este mércores en contra dun convenio estatal que, segundo sosteñen, "rebaixa dereitos" ao persoal en relación aos incluídos no actual convenio provincial, regulado a través do comercio vario.
 

Foi con motivo dunha xornada de folga convocada por CIG e UXT para expresar o rexeitamento ás pretensións, indicaron, da patronal integrada prol as grandes empresas do sector de "impor" un convenio de ámbito estatal.

E é que, segundo os representantes sindicais, o mesmo supón "peores condicións que as recollidas no convenio provincial do comercio vario". Así o expuxeron na presentación das mobilizacións e durante esta xornada, con protestas ante os centros de traballo e tamén con concentración na praza de Lugo, na cidade herculina, con participación dunhas 300 perosnas.
 

"A xornada de folga está a ser un éxito", asegurou Lucía Domínguez, da CIG, que subliñou que no caso da Coruña cidade -- a convocatoria foi a nivel provincial -- houbo establecementos que só tiñan traballando "a persoas" a través de empresas temporais de emprego.

REUNIÓN EN MADRID

"Non con persoal da empresa", aseverou en relación a unha folga que afectou a grandes empresas do sector téxtil. Por outra banda, indicou que nos últimos anos lograron "mellorar as condicións" do persoal a través de negociacións provinciais e engadiu que en 2023 as grandes empresas do sector crearon unha patronal "para implantar un convenio estatal", para cuxa negociación hai convocada nesta xornada unha reunión en Madrid.
 

"As propostas do convenio son moi inferiores ás que temos hoxe en día, supón enterrar dereitos das dependentas", engadiu para indicar que lles quitará tamén "capacidade de decidir".

"Reclamamos unha negociación aquí", insistiu en alusión a un convenio provincial e para subliñar que o estatal suporía unha perda salarial de 3.000 euros ou a "desaparición" de licenzas obtidas como as relativas a asuntos propios ou redución de xornada por coidado de fillos até os 14 anos. Todo iso en relación a unha medida que afectaría a unhas 2.500 empregadas e empregados.
 

"Non podemos perder nada" foi un das lemas que se podía ler nunha das pancartas que exhibiron nas súas protestas nunha xornada sen incidencias, con algunhas tendas pechas durante a concentración, e na que as participantes corearon proclamas como "aquí traballamos, aquí negociamos" ou "queren esmagar os nosos dereitos".