O BNG acusa de "neglixencia" á Xunta ante a proliferación de novos casos de lingua azul no gando

O BNG pediu á Xunta de Galicia, tras a nova onda de casos de lingua azul, que vacine de forma gratuíta a todas as explotacións gandeiras desta enfermidade "que así o desexen". Deste xeito, considerou unha "neglixencia" o cambio de estratexia en canto á vacinación, que desde inicios de ano non é obrigatoria tras un acordo entre o Goberno central e as comunidades autónomas.

Esta é unha enfermidade de declaración obrigatoria (EDO), como indicou a formación, da que esta semana se confirmaron os primeiros cinco focos de dous novos serotipos en lugares das catro provincias.

"Era evidente que o risco era alto e a Xunta de Galicia optou por non protexer á súa cabana gandeira, tanto de bovino como de ovino", afeou a portavoz de industrias agroalimentarias do BNG no Parlamento, Ariadna Fernández, nun audio remitido aos medios.

Nesta liña, criticou o actual carácter voluntario deste método de prevención: "Cargar aos titulares das explotacións non tivo outro obxectivo que máis que aforrar en medios, persoal e material e agora son os gandeiros quen sufrirán as consecuencias". Ademais, Fernández apuntou que esta "crise" chegou cando as explotacións "aínda non se recuperaron" da Enfermidade Hemorráxica Epizoótica (EHE).

En consecuencia, solicitou á Consellería de Medio Rural que a vacina se administre de forma gratuíta a todas as explotacións que así o soliciten para "actuar cun mínimo de solvencia" ante unha situación que se prevé "complicada".