A sentenza sobre o parque eólico do Campelo "confirma a axeitada tramitación" da Xunta, asegura Lorenzana

A conselleira de Economía e Industria, María Jesús Lorenzana, celebra a sentenza do Tribunal Supremo que avala a tramitación do parque eólico de Campelo, o que "confirma a axeitada tramitación das autorizacións dos parques eólicos por parte da Xunta de Galicia".

O pasado venres, a Xunta xa sinalou que ese fallo "abre a porta a levantar a paralización polo Tribunal Superior de Xustiza de Galicia de 64 parques eólicos".

Este sábado, Lorenzana visitou o parque eólico Xiabre, cun proxecto de ampliación paralizado polo Tribunal Superior de Xustiza de Galicia (#TSXG) e pendente de resolución xudicial. Entre os 99 parques sobre os que neste momento hai presentado un recurso en Galicia, este é un dos 77 que están paralizados. Por tanto, segundo a conselleira, esta sentenza é unha "moi boa noticia".

O parque eólico de Xiabre, situado entre os concellos de Vilagarcía de Arousa, Catoira e Caldas de Reis, está en funcionamento desde o ano 2006 e conta con 16 aeroxeradores.

PUNTOS DE RECARGA ELÉCTRICA
Por outra banda, a conselleira visitou este sábado, no Hotel Augusta Eco Wellness Resort, en Sanxenxo, un punto de recarga de vehículos eléctricos inscrito no novo rexistro público galego.

Defende a necesidade de que Galicia conte cunha sólida rede de puntos de recarga para vehículos eléctricos. Remarca que que en tres meses estará operativo na páxina web da Consellería de Economía e Industria un visor que funcionará como un mapa interactivo onde facer consultas en tempo real sobre a localización destas instalacións.