Publicadas as subvencións da Xunta para plantar 23.800 castiñeiros en 289 hectáreas
A Xunta de Galicia subvenciona a plantación de castiñeiros como parte da súa estratexia para promover o desenvolvemento económico e a sustentabilidade nas zonas rurais, xa que esta especie produce castañas, un froito de alto valor comercial, e madeira de gran calidade, xerando ingresos adicionais para os propietarios forestais. Ademais, os castañares contribúen á conservación da paisaxe, a biodiversidade e a loita contra a erosión do solo, fomentando prácticas sostibles que revitalizan o medio rural e preservan o patrimonio natural e cultural de Galicia.
O Diario Oficial de Galicia (#DOG) publicou este luns o anuncio polo que se resolven as axudas da Consellería do Medio Rural para o fomento de plantacións de castiñeiro para froito e para a rexeneración e mellora dos bosques de castiñeiros tradicionais, dotadas con 1,35 millóns de euros.
Nun comunicado, a Xunta indicou que este investimento permitirá a plantación de algo máis de 23.800 árbores e actuar nun total de 289 hectáreas, "reforzando desta maneira o papel de Galicia como principal comunidade autónoma en produción e exportación de castañas".
A provincia máis beneficiada é a de Lugo, que acumula un 67,7% do orzamento, xa que a presenza desta especie é maioritaria en zonas interiores e de montaña.
O Executivo autonómico ha explicado que estas axudas están divididas en dúas liñas, a primeira centrada no fomento de plantación para froito e a segunda na rexeneración. Así, na primeira delas localízase a única entidade local beneficiaria, o Concello de Pazos de Borbén (Pontevedra).
Escribe o teu comentario