Subvencións da Xunta para coches eléctricos e puntos de recarga
As axudas varían entre os 9.000 euros e os 700 euros en función do modelo de vehículo e do tipo de solicitante. As persoas físicas, autónomos, comunidades de propietarios e outras administracións son as que recibirán maiores contías.
A conselleira de Economía e Industria, María Jesús Lorenzana, lembrou que o prazo de solicitudes do plan Moves III, para a compra de coches eléctricos e outros vehículos eléctricos e a instalación de puntos de carga, segue aberto.
A conselleira visitou este mércores o Palacio da auga do Balneario de Mondariz onde enxalzou a aposta dese complexo termal pola sustentabilidade e a innovación e destacou que "está adaptado aos novos tempos" e son beneficiarios dunha axuda do plan Moves III co que instalaron sete novos cargadores eléctricos.
Neste sentido, a conselleira lembrou que o Instituto Enerxético de Galicia (#Inega) ampliou até final de ano o prazo de solicitudes deste programa co obxectivo de conceder os fondos que aínda están dispoñibles.
En concreto, desde que se abriu a convocatoria en 2021, rexistraron preto de 10.000 solicitudes, cunha media de 270 solicitudes ao mes, das que a Xunta resolveu máis do 80%, cun investimento mobilizado superior aos 210 millóns de euros.
As axudas van destinadas á compra de vehículos eléctricos e á instalación de puntos de carga.
Escribe o teu comentario