Plataforma Ulloa Viva acusa á Xunta e ao Estado de escoitar antes a Altri que aos cidadáns

A portavoz da Plataforma Ulloa Viva, Marta Gontá, criticou este sábado nun acto convocado por Monterroso Vivo que a Xunta e o Estado escoiten antes a Altri que aos veciños e veciñas do Alto Ulla.

No acto, do que informou a plataforma nun comunicado, Gontá cualificou de "indignarche" que os políticos que "terían que representar a todos os galegos" estean máis preocupados por favorecer a unha empresa que por atender as preocupacións e demandas dos seus representados.

A portavoz da Plataforma Ulloa Viva mostrou, ademais, o "malestar" entre os veciños despois dunha semana na que coñeceron que "o Concello de Pas tiña un informe do arquitecto municipal de decembro de 2022 en contra da instalación de Greenfiber na Leira Quintas".

Sobre esta cuestión, criticou que, como única solución, o concello esperase ao 29 de decembro a que a Xunta declarase o proxecto industrial como estratéxico, para "#saltar a normativa que incumpre".

Ante estes feitos, asegura que os veciños queren saber por que este "trato de favor" a unha empresa privada, que "ademais nesa data segundo o propio director do proxecto non tiña nin feito o estudo de impacto ambiental".

Gontá incidiu en que Altri non é un problema só do Alto Ulla, senón "de toda Galicia", e chamou a todos os galegos a mobilizar o próximo día 26 de maio en Pas en contra do proxecto.

A portavoz da plataforma destacou que vestirán os pobos e aldeas con pancartas e lemas para deixar claro que "Altri non". "Queremos o modelo socieconómico que estamos a crear entre todas, e non un que nos vén imposto", sinalou.

Monterroso Vivo convocou este sábado unha xornada creativa na que un centenar de persoas reuníronse para elaborar pancartas para a manifestación en contra do proxecto da macrocelulosa de Altri.

RESPOSTA A GREENFIBER
Ademais, a plataforma respondeu ao comunicado remitido aos medios por Greenfiber este sábado, no que aseguraba que a planta de Palas de Rei non tería impacto sobre o Camiño de Santiago.

Respecto diso, a Ulloa Viva sinalou que se trata dunha "nova mentira" da compañía sobre os impactos do seu proxecto e recomendáronlle á entidade que utilice o Sistema de Información Xeográfica de Parcelas (SIXPAC) da Xunta de Galicia, ao sinalar que "demostra unha vez máis que a pasteira portuguesa amente sistematicamente e tenta tratar por parvos aos galegos a través de titulares de prensa".

Ademais, a plataforma lembrou que xa presentou alegacións respecto diso do impacto da planta e a súa distancia do Camiño Francés. "O colmo das mentiras desta empresa é que queira cambiar a xeografía galega e as distancias oficiais nos mapas, para tentar lavar a cara ao seu proxecto".