O aumento das mortes en accidentes de traballo en Galicia acende a indignación en todos os sectores

O venres 26 de abril CCOO e UXT concentráronse ante a sede da Inspección de Traballo no Día Internacional da Saúde Laboral no Traballo onde lembraron un dato que impresiona. No que vai de 2024 xa se produciron 13 mortes no posto de traballo, nove delas na provincia de Pontevedra. As outras se produciron en Ferrol, Lugo, Ourense, A Coruña e Santiago. Se se buscan motivos, cada suceso prodúcese nun contexto onde adoitan predominar as premas na produción por parte de empresarios, a obsolescencia de EPIs de seguridade para os traballadores, ás veces o exceso de confianza da persoa traballadora e a non observancia nas medidas de seguridade e saúde laboral. 

POSIBLES CAUSAS

“É un conxunto de circunstancias, desde a falta de formación, a precariedade laboral, as présas ou as neglixencias” sinala Enrique Alonso de CCOO. “Tamén están os riscos psicosociais no posto de traballo aos que se atribúen mortes por infarto ou derrames” di Xosé Luís Fernández Celis de UXT. “Las medidas de seguridade relaxáronse, ademais, a Xunta ten competencias en materia de saúde laboral pero está desaparecida” segundo Francisco González Sio de CIG.

González Sio sinala tamén que “Galicia está nos primeiros postos de sinistralidade laboral e mentres outras Autonomías avanzan en seguridade aquí seguimos na mesma situación”. No entanto, hai quen observa factores novos que aínda non se abordaron nunha mesa de diálogo laboral. “O cambio climático cos seus cambios de temperaturas, insectos que non existían na nosa contorna e agora poden ser vectores de enfermidades ou a desconexión dixital necesaria nos nosos días” apunta Fernández Celis. 
 

Todo o apuntado pódese previr mediante formación, con todo, aínda a día de hoxe existen algúns empresarios remisos a esta formación laboral. “Ás veces existe a sensación que os cursos de formación e seguridade laboral fanse para cubrir o expediente recorrendo ás veces á formación online” resalta Alonso.

A falta de formación e de experiencia son dous elementos tamén a ter en conta en canto a evitar riscos e accidentes no posto de traballo. As fontes sindicais indican que parte do empresariado recoñece o realizar unha “formación pantasma”. 

MEDIDAS A TOMAR

Hai consenso entre as diferentes forzas sindicais en que a Lei de Prevención de Riscos Laborais, aprobada en 1995, está desactualizada. A súa reforma debería incluír unha nova nomenclatura de enfermidades laborais a día de hoxe non recoñecidas. “É necesario actualizar esta lei e reforzar a Inspección de Traballo, mesmo estender o control de riscos aos Corpos e Forzas de Seguridade do Estado” afirma Fernández Celis e remarcando “que se deben rexistrar novas situacións de risco para os traballadores no seu posto”.

González Sio coincide na redución de persoal no corpo de Inspección de Traballo o que se traduce na “falta de esixencia ao aplicar unha acción punitiva” nunha empresa que non cumpre coas medidas necesarias. Por outra banda, en moitas empresas o delegado de prevención “sente abandonado ao non sentir o apoio da Administración para que o empresario cumpra coas súas obrigacións en materia de seguridade”.

“A formación costa diñeiro, pode atrasar o traballo e reducir ingresos”, estes son argumentos que poden usar algúns empresarios para evitar formación en prevención, segundo Enrique Alonso. Isto non parece ir en consonancia coa sensación existente entre as formacións sindicais de que desde a empresa están a apurarse os tempos para unha maior e máis rápida produción.
 

Incrementar o número de funcionarios en Inspección de Traballo, que a formación en prevención sexa real, reforma da actual Lei de Prevención de Riscos Laborais e actualizar a nomenclatura de empregos con risco para a saúde, son algúns dos puntos que reclaman desde as organizacións sindicais ante o aumento de sinistralidade laboral durante o primeiros catro meses de 2024.