Vídeo | O Celta cae ante un Osasuna máis efectivo nos seus movementos

O fútbol, en ocasións, carece de lóxica e xustiza. O RC Celta caeu derrotado este venres en Balaídos ante o CA Osasuna (1-2) nun partido marcado por unha choiva torrencial e unha falta de puntaría que contrastou coa eficacia cirúrxica do conxunto visitante. A pesar de ter o control e as oportunidades, o equipo vigués quedou co mel nos beizos e mantense con 33 puntos na táboa.

Un inicio prometedor baixa a auga

O encontro arrincou cun Celta mandón. Claudio Giráldez sorprendeu deixando no banco a pesos pesados como Iago Aspas e Óscar Mingueza, apostando por Javi Rueda e Sergio nas bandas, con Hugo Álvarez, Fer López e Borja Iglesias como tridente ofensivo.

As ocasións non tardaron en chegar. Javi Rodríguez avisou cun disparo alto e, pouco despois, Hugo Álvarez desperdiciou un man a man que Sergio Herrera detivo coas pernas. O "Panda" tamén tivo a súa tras un centro de Rueda, pero o seu remate marchouse desviado. Pola súa banda, o Osasuna de Alessi Lisci —que deixou a Matías Veciño no banco— sufría non só o empuxe local, senón tamén a lesión de Enzo Boyomo, substituído por Jorge Herrando no minuto 30.

O castigo á falta de pólvora

Cando mellor estaba o Celta, chegou o xerro de auga fría. No minuto 35, no que foi o único achegamento navarro da primeira parte, Raúl Moro puxo un centro medido desde a dereita e Ante Budimir gañoulle a partida a Starfelt no salto para bater a Radu. O 0-1 descolocó aos celestes, que se foron ao descanso coa sensación de perdoar demasiado.

Tras a continuación, a esperanza volveu a Balaídos. Munuera Montero sinalou penalti por man de Catena tras un disparo de Borja Iglesias. Tras unha revisión do VAR "surrealista" por un choque previo, o colexiado reafirmouse e o propio Borja Iglesias enganou a Herrera para pór o 1-1, sumando o seu noveno gol do curso.

A efectividade visitante decide

O empate non trouxo a calma esperada. Aínda que o Celta tivo opcións para remontar, especialmente nunha contra de Javi Rueda e unha gran xogada individual de Williot Swedberg que salvou Herrera, foi o Osasuna quen golpeou de novo. No minuto 78, unha xogada mal defendida polos locais terminou con Raúl García de Haro enviando o balón ao fondo das mallas tras un mal despexe.

Giráldez queimou todas as naves dando entrada a Iago Aspas e Jutglá. O de Moaña tivo o empate nun cabezazo a centro de Jones, pero novamente Herrera erixiuse en heroe. Ao final, os puntos voaron cara a Pamplona.

Giráldez: «É un partido claro para gañar nós»

Na sala de prensa, Claudio Giráldez non ocultou a súa frustración polo resultado, cualificándoo de inxusto. "Radu non fixo ningunha parada, non tiraron máis a portaría que nos goles", lamentou o técnico porriñés, quen criticou a falta de disparos afastados aproveitando o céspede mollado. "Se aprendésemos de Oyarzabal hai dúas semanas, hoxe gañásemos", engadiu.

A pesar da derrota, o Celta mantense nunha cómoda sétima praza, aínda que Giráldez insistiu en que o obxectivo principal segue sendo certificar a permanencia: "Necesitamos sumar dez puntos máis".