"Erros de cálculo" atrasan o proxecto para a cuberta do Estadio da Malata

O alcalde de Ferrol, José Manuel Rey Varela (#PP), anunciou este luns a desestimación provisional da licitación das obras da cuberta do estadio da Malata tras detectar "erros de cálculo" no proxecto.
 

O rexedor asegurou que o obxectivo é "emendar" os problemas "canto antes para evitar consecuencias futuras" e que nos próximos días abrirase un novo prazo de ofertas coas correccións pertinentes.

"Detectamos erros de cálculo no proxecto, un proxecto cunha complexidade importante, erros do equipo técnico redactor e axiña que se detectan eméndanse para evitar problemas futuros nesta obra", explicou Rei Varela tras a Xunta de Goberno Local.
 

Pese ao contratempo do estadio que utiliza o equipo de fútbol do Racing de Ferrol, a reunión semanal do goberno popular deu luz verde a outros proxectos.

Así, dentro de 'Abrir Ferrol ao Mar', aprobáronse as adxudicacións dos servizos de coordinación integral e dirección de obras do proxecto na contorna do Arsenal e A Magdalena.

A dirección de obras recaeu na empresa Proife por 168.190 euros e a coordinación de seguridade e saúde en Incope Consultores por 23.850 euros.

Con estas adxudicacións, o proxecto queda á espera da aprobación do plan de seguridade e saúde para finalizar o proceso administrativo, e desta maneira poder iniciar a derriba da muralla que limita a instalación militar.
 

Ademais, aprobouse o expediente de contratación das obras da Cidade Náutica da Cabana, por un importe de 1.777.966 euros, onde o obxectivo do Concello é ter o proxecto adxudicado leste mesmo ano 2025 para que as obras poidan comezar en 2026, cun prazo de execución de 14 meses.

Tamén se deu luz verde á adxudicación das obras para executar un local social no barrio de Recimil por 435.224 euros. Trátase dunha actuación "esperada desde hai moito tempo" e que permitirá aos veciños contar cun local social nun prazo de execución de nove meses.

ORZAMENTOS XERAIS DO ESTADO

Noutra orde de asuntos, Rei Varela quixo facer un balance do documento dos Orzamentos da Xunta de Galicia para o próximo ano 2026. O popular destacou "a aprobación en tempo e forma" por parte do Goberno autonómico, algo que contrastou coa situación estatal.

"Nós estamos a elaborar os orzamentos do ano 2026, farémolos coñecendo os da Xunta de Galicia, pero cremos que temos que facelos sen coñecer os do Estado".
 

O alcalde valorou especialmente a partida de 2,9 millóns de euros da Xunta para o proxecto da Cidade do Deporte, e a "marca" en investimento en vivenda pública, que se achega ao obxectivo de acabar o ano 2028 con 500 novas vivendas públicas promovidas pola Xunta na cidade.

APOIO Ao TREN

Finalmente, o rexedor mostrou a súa "total coincidencia" coa iniciativa cidadá que reclama a conexión ferroviaria de alta velocidade para Ferrolterra e anunciou que buscará unha declaración unánime da Mancomunidade de municipios.

"Ferrol non pode perder o tren unha vez máis, non o imos a permitir", sentenciou Rei Varela, quen reclamou ao Ministerio de Transportes que deixe de "maltratar" á cidade en comparación con outras grandes urbes galegas.