O galego Pablo Insua, o talismán e muro intocable do Sporting de Xixón

Cando Diego Mariño fixo as maletas a tempada pasada, o Sporting de Xixón quedou sen un dos seus baluartes. O porteiro vigués foi durante anos o referente do cadro branquivermello e un seguro baixo os paus. Coa súa partida o Sporting perdeu a fiabilidade defensiva que o definía, pero agora parece habela recuperado da man doutro galego que, ademais de cortar todo balón que se coa na área asturiana, dá puntos en forma de goles.

Pablo Insua chegou o ano pasado ao Molinón despois de varias campañas de éxito na #SD Huesca, co que logrou un ascenso a Primeira -algo que tamén fixo no Deportivo da Coruña e posteriormente no Leganés-, o Sporting apostou por este futbolista talismán para tratar de regresar a unha Primeira que se lle resiste desde hai xa sete tempadas.

Nos últimos anos os xixoneses afastáronse do obxectivo e mesmo coquetearon nalgunha ocasión co descenso, un feito que sería insólito nun club que desde a súa fundación non coñece o mundo máis abaixo do fútbol de prata, un dos poucos equipos que poden presumir diso. Insua suma un pleno de minutos nos seis partidos disputados, sendo imprescindible para Miguel Ángel Ramírez e comandando unha zaga que conta con nomes tan relevantes como os de Cote, Izquierdoz ou o seu paisano Rober Pier, recentemente chegado a Asturias e que xa participou en seis encontros. 

O seu gol no desconto ante o Tenerife cun cabezazo poderoso deu os tres puntos ao Sporting e a súa terceira vitoria en casa, convertendo O Molinón nunha fortaleza infranqueable. A vitoria resísteselles a domicilio, algo que poden remediar na saída a Andorra deste fin de semana. Para iso necesitarán a mellor versión do galego, que parece decidido a facer o que mellor sabe facer: ascender equipos.