A carreira inclusiva de Enki regresa á cidade da Coruña este 21 de outubro
Despois de varios anos de éxito, para esta edición o Concello espera unha marca de corredores con máis de 10.000 participantes.
A décima edición da carreira inclusiva de obstáculos Enki celebrarase o domingo 21 de outubro na Coruña baixo a lema '10 anos correndo por un mundo inclusivo son só o comezo' para a cal "hai inscritos 7.000 participantes e o obxectivo é pasar dos 10.000".
Así o manifestaron este martes na presentación do evento a alcaldesa da cidade herculina, Inés Rey; o presidente de Enki, Anxo López; e o delegado territorial da Xunta na Coruña, Gonzálo Trenor.
A rexedora destacou que son "moitas as accións que leva a cabo a Fundación Enki ao longo do ano na súa loita pola inclusión e a visibilización" e recalcou que esta carreira é "un referente en toda Galicia".
Na mesma liña, Trenor sinalou que este evento é "tradición" na cidade e "cada ano mellora en participantes e en actividades". Respecto desta edición, dixo que é "máis importante e especial porque chegar a cumprir dez anos é moi complicado".
"Queremos bater a marca de participación, somos a carreira máis multitudinaria de Galicia pero queremos seguir sendo un referente de visibilidade", indicou o presidente de Enki, tras explicar que o lecer e o deporte é para todas as persoas "independentemente da súa condición física e psíquica".
A recadación total deste evento, segundo detallaron, destinarase á adquisición de material deportivo adaptado e a posta en marcha de actividades de lecer e deporte para entidades sociais.
Escribe o teu comentario