Pesar nas Pontes pola morte do triatleta de 49 anos que levaba ingresado desde o 25 de xuño

O deportista sufriu un desmaio durante a celebración do Northwest Triman das Pontes, celebrado o pasado 25 de xuño.

Tras máis de dez días na UCI, o triatleta faleceu no hospital ferrolán, tral e como informou o portal Triatlon Channel no día de onte. 

O triatleta de 49 anos que permanecía ingresado no hospital Arquitecto Marcide de Ferrol tras desvanecer durante a súa participación no Northwest Triman das Pontes o pasado 25 de xuño faleceu nas últimas horas.

Fontes consultadas a Europa Press confirmaron este xoves o falecemento que avanzou na tarde do mércores o portal Triatlon Channel.

O home, que debutaba na proba pontesa, desvaneceuse durante o primeiro segmento da competición, na parte de natación, pouco antes de chegar á beira. Tras recibir o aviso de otroparticipante, tanto a organización como os servizos de salvamento e socorrismo actuaron con celeridade para evacualo a terra e proceder á súa reanimación.

Inmediatamente despois foi trasladado ao hospital Arquitecto Marcide de Ferrol, en cuxa Unidade de Coidados Intensivos permanecía ingresadodesde entón.