Lecomte, a chave para a saída de Denis Suárez do Celta e a súa chegada ao Espanyol

O porteiro do Espanyol ultima a súa saída do cadro barcelonés, facendo máis oco para a chegada de Denis Suárez ao equipo dirixido por Diego Martínez.

O centrocampista de Salceda de Caselas aínda pertence ao Celta de Vigo, que podería anunciar a rescisión do seu contrato ao longo desta xornada. 

Quedan cinco días e unhas poucas horas ata que bote a persiana o mercado de fichaxes invernal, onde varios equipos aínda teñen moito traballo por facer tras case un mes de conversacións para reforzar os seus equipos ou dar saída ás pezas que lle sobran. Nestes dous apartados están a traballar nas oficinas da Sede e a contrarreloxo, cun baile de nomes no capítulo de chegadas pero con só unha figura pendente da porta de saída, que non é outra que o proscrito Denis Suárez.

O de Salceda de Caselas apura os seus últimos momentos como celeste no que parece que será unha operación para rescindir o contrato do centrocampista. O canteirán terá así unha vitoria pírrica ante Carlos Mouriño, presidente da entidade olívica e enfrontado co futbolista, os seus representantes e todo aquel que defenda a Denis. As últimas informacións sinalan que Campos logrou convencer ao dirixente para alixeirar o persoal e dar a carta de liberdade ao ex do Barça, City ou Sevilla, que en xuño regresará ás filas do Vilarreal, case con toda seguridade.

SALGUE LECOMTE, ENTRA DENIS

Pero antes de enfundarse de novo a elástica amarela, a Denis espéralle un paso previo pola cidade codal, no eterno rival dos azulgranas. O Espanyol de Diego Martínez espera a Denis cos brazos abertos, pero tamén pendente de dar saída a outros futbolistas para poder acometer a contratación do centrocampista, que asinará un contrato curto até este verán para dispor de minutos de calidade cos que recuperar o ton tras media tempada apartado dos terreos de xogo.

É aquí onde se erixe Lecomte, o porteiro dos pericos que hoxe está no disparadero. A meta galo regresará ao campionato francés, previsiblemente ao Montpellier, despois de perder a partida con Álvaro Fernández pola titularidade do conxunto branquiazul. O cérbero non se exercitou co resto do equipo e prepara a súa marcha a Francia, onde tivo o permiso do club catalán para viaxar e resolver a súa situación.

O técnico espanyolista referiuse ao gardameta en rolda de prensa pero tamén a Denis, do que recalcou que non é un xogador da súa disciplina. "Hai moitos nomes, moitos rumores neste momento de mercado. Aos nomes coñecédelos mellor que eu, pero non vou falar de ninguén que non teña nada que ver connosco nin co equipo", comentou o preparador galego, que tamén falou da situación de Pol Lozano, outro que podería buscar minutos fóra da escuadra periquita e ceder o dorsal 6 a Denis Suárez.