As vodas de ouro da Festa do Queixo, un éxito cuantificable en Arzúa: 50.000 visitantes, marca de vendas...

Este luns é, se cabe, un pouco máis luns que outras veces, pois hoxe nos toca superar a resaca dunha nova edición da Festa do Queixo, pola que teremos que esperar ao seu regreso o ano que vén. Arzúa amenceu co cheiro do queixo DOP Arzúa-Ulloa aínda no aire despois dun fin de semana de celebración gastronómica e cultural na capital quesera por antonomasia. E é que esta non foi unha edición calquera, senón que se celebrou o medio século de vida desta festa de recoñecemento nacional que atraeu a decenas de miles de curiosos, talvez atraídos polo olorcillo dos queixos e produtos típicos que se dispensaron no recinto feiral ou pola música dunha nova edición rompedora do Festival do Queixo.

FULMINANDO MARCAS

Os organizadores xa botaron man dos datos para confirmar que esta foi unha edición "histórica". Non dubidan en cualificar así á Festa do Queixo de 2025 pola que pasaron máis de 50.000 visitantes para gozar das moitas actividades que preparou a organización, desde catas e propostas como a Ruta de Tapas e Petiscos onde participaron case unha vintena de locais até presentacións literarias, pasando polo showcooking da pregoeira, Lucía Freitas, os espectáculos pensados para os máis pequenos ou os concertos. 

A satisfacción é total pois o ir e vir de persoas dinamizou a economía desta localidade do interior, onde se superou a marca de vendas nos 80 expositores que este ano lograron facer cun oco na 'Terra do Queixo', destinando un espazo da primeira planta a produtos gourmet. O sentir xeral de todos os que gozaron dunha caseta neste selecto evento é que o número de vendas foron moi elevadas, chegando a esgotar as existencias nalgúns expositores, o que deixa ás claras a "fame" demostrada polo público da Festa do Queixo. 

Sen saír de Arzúa, as catro queserías locais que participaron no evento, Barral, Galmesán, Verbas e Casa Donicio, salientaron a alta afluencia de visitantes e os máis que positivos niveis de venda. A continuación, desde a debutante Asociación Ruta Europea do Queixo mostraron o seu interese en repetir a experiencia o ano que vén despois dunha sensacional acollida.

UN BAILE SEMPRE SE BOTOU...

No entanto, outro ano máis a gran triunfadora foi a cultura e os que saíron perdendo foron os pés dos asistentes, cansados por todos os bailes que se botaron nos concertos da noite do sábado e nas actuacións do domingo, onde podemos destacar o espectáculo Son de Arzúa, con tres agrupacións da localidade dando o punto musical.
 

En total, estímanse máis de 12.000 espectadores nas actuacións deste Festival do Queixo, que para este ano contou con Xoel López como prato principal do sábado e con Xisco Feijóo para clausurar un fin de semana onde se reivindicou o talento que garda esta comunidade, con actuacións memorables como a de Mondra, que contou cunha invitada de luxo como a tanxugueira Aida Tarrío, coa que interpretou 'Ruando'. 

O estilo descarado de The Rapants, o descubrimento de Cariño ou o chupinazo de Capital Voskov, gañadores do Queixo Maquetón, foron outros dos grandes momentos desta edición, consolidando a cita como unha das máis importantes do panorama festivalero. Un canto á cultura do país, que enche os corazóns e os estómagos a partes iguais.