Subvencións da Xunta para lanzar as carreiras musicais de artistas e grupos galegos

O Consello da Xunta aprobou este luns a activación dunha nova liña de axudas para proxectos de creación, produción, promoción e difusión musical, a través da cal se investirán 150.000 euros no "apoio integral" ás carreiras de artistas e grupos que desenvolvan a súa actividade habitual en Galicia.

O obxectivo desta convocatoria, destacou o presidente Alfonso Rueda, é impulsar o talento musical galego, así como consolidar a cadea de valor desta industria cultural, de modo que se favoreza a calidade dos proxectos, a profesionalización e a modernización, co foco posto no uso das novas tecnoloxías e a dixitalización.

Poderán optar a estas axudas empresas galegas (pemes e persoas traballadoras autónomas) que se dediquen ao 'management artístico' ou á edición fonográfica, para impulsar o ascenso ou a consolidación dos artistas e bandas que representan a través de calquera dos ámbitos do proceso musical.

As bases, que aprobou este luns o Consello, establecen unha axuda máxima de 15.000 euros por proposta, cunha intensidade de até o 75% do orzamento subvencionable, de modo que poidan cofinanciar un mínimo de 10 proxectos.

Para a súa concesión, en réxime de concorrencia competitiva, valoraranse as traxectorias da empresa e da formación musical para a cal se solicita a axuda, así como o uso do galego ou a presenza feminina en postos relevantes do proxecto, entre outros aspectos.

Subvencionaranse mediante estes convocatoria gastos realizados entre o 1 de xaneiro de 2025 e o 31 de maio de 2026 que teñan que ver coa creación, consolidación ou impulso da imaxe de marca do artista ou banda, os estudos de mercado e as estratexias de posicionamento, a concepción, o lanzamento e a presentación dun novo produto musical, os labores de promoción, ou a gravación e distribución de traballos discográficos.

ESTUDO DO GALEGO EN BRASIL
Por outra banda, a Xunta promoverá o estudo da lingua, literatura e cultura galegas no Brasil a través dun convenio de 12.000 euros coa Universidade Federal de Bahía, cun período de duración de tres anos.

Foi o Consello da Xunta o que deu luz verde á firma dun convenio para a docencia, a investigación e o impulso da lingua nesta institución académica, que suporá ademais a contratación dunha persoa para unha praza de lectorado. A achega da Consellería de Cultura será de 12.000 euros, repartidos en 4.000 euros por cada unha das tres anualidades (2025-2027) que ten de vixencia este convenio, que renova o asinado para o período 2022-2024.

A Xunta e a Universidade Federal de Bahía manteñen esta colaboración desde fai 24 anos con firmas de convenios plurianuais, establecidos desde 1996.

MUÍÑO DO PAN DE BAAMONDE
Finalmente, o Consello da Cultura acordou este luns a incorporación do Centro de Interpretación do Muíño do Pan de Baamonde, situado no municipio lucense de Begonte, ao Sistema Galego de Centros Museísticos.

O Consello autorizou esta decisión tras a avaliación dos informes que verifican o cumprimento dos requisitos esixidos para formar parte da rede galega de organismos expositivos que xestiona o Goberno autonómico e que, na actualidade, suma un total de 89 institucións, das cales 69 son museos e 20 son coleccións museográficas.

O Muíño do Pan de Baamonde é un ben construído seguindo a arquitectura tradicional da Terra Chá que se atopa no espazo natural da ribeira do río Parga. Grazas ao proceso de rehabilitación levado a cabo pola entidade que o xestiona, na actualidade, este espazo confórmase como unha aula en que se ensina o seu funcionamento e onde, a través de paneis informativos, proporciónanse as claves da súa historia. Deste xeito, ponse en valor o carácter etnográfico do oficio de moer para obter a fariña que está estreitamente vinculado ás tradicións e ao contexto social do rural galego nesta localidade.