Bala súmase ao ciclo de concertos Noites do Porto o 27 de setembro na Coruña
A formación presentará o seu directo 'Besta' o venres 27 de setembro na sala Inn Club da cidade herculina.
Sen présa, pero deixando alegrías en cada anuncio, o goteo de nomes que comporán a IV Edición do ciclo Noites do Porto na Coruña engade cada vez máis calidade a esta proposta que xa parece totalmente consolidada no panorama cultural da comunidade. Para abrir o outono -ou estirar un pouco máis o verán- estaban xa anunciados os concertos de Baiuca e Carlangas e Os Cubalibres o 28 de setembro no Peirao de Batería, ademais da inauguración o 7 de setembro na Praia Club coa actuación de Mudhoney. Agora é Bala a que se suma a este compendio.
Trátase da formación que compoñen Anxela Baltar e Violeta Mosquera, dous nomes propios do rock no país e que con motivo do seu novo disco, o cuarto da banda, presentan o seu directo 'Besta', co que atronarán a Sala Inn Club o vindeiro venres 27 de setembro.
O dúo galego, que se abriu paso no circuíto cun son singular que lembra ao rock dos 90 pero que se move entre o punk e o hardcore, xa ten as entradas á venda para esta cita en Ticketmaster e Ataquilla.com. Esta é só a nova confirmación da edición máis ambiciosa de Noites do Porto, que este ano amplía de seis a oito o número de xornadas de música, con máis artistas e máis recintos implicados.
Escribe o teu comentario