Fillas de Cassandra colga o 'Non hai billetes' para a estrea de 'Últimas Dionisíacas', o seu novo show
O dúo que revolucionou a música galega desde a súa irrupción na escena do país prepara un novo espectáculo que estrearán en Vigo o 16 de febreiro.
O grupo Fillas de Cassandra esgotou as entradas dispoñibles para a presentación do seu novo directo, 'Últimas Dionisíacas', que terá lugar o 16 de febreiro no hall do Auditorio Mar de Vigo.
En menos de 10 días, o dúo conformado por María Soa e Sara Faro vendeu os 1.400 billetes dispoñibles para a cita.
'Últimas Dionisíacas' é a nova proposta escénica e musical do grupo, que fará unha revisión dos temas máis recoñecidos do seu primeiro LP, Acrópole, "desde unha electrónica máis escura e potente"; ademais de recuperar algúns dos sinxelos publicados nos últimos meses e avanzar noutros inéditos para o público.
Destacan que, neste novo directo, a luz e a escenografía terán un papel "moi relevante". O dúo estará acompañado por outras dúas músicas sobre o escenario (Tania Caamaño e Mariña Vidal). Así mesmo, participarán diversas artisas cuxas identidades aínda non se revelaron.
Escribe o teu comentario