A taxa turística aplicarase na Coruña en canto finalice a tempada de verán

O Concello da Coruña comezará a aplicar a taxa turística o luns 29 de setembro, coincidindo coa finalización da tempada de verán.
 

Segundo traslada o consistorio, o concelleiro de Economía e Planificación Estratéxica e portavoz do goberno municipal, José Manuel Lage, mantivo unha reunión este xoves coa directiva da Asociación Empresarial de Hospedaxe da Coruña (Hospeco). Na mesma, informou da folla de ruta formulada para implantar esta recarga municipal sobre o imposto autonómico ás estancias turísticas.

Neste sentido, engade, a previsión é que entre en vigor o luns 29 de setembro, coincidindo coa finalización da tempada estival. O obxectivo de elixir esta data, explica, é "darlle todas as facilidades posibles ao tecido hostaleiro da Coruña nesta transición inicial cara á implantación da taxa".

Para Lage é unha tarifa "necesaria" debido a que "o turismo está a se incrementar de forma sostida e iso xera un impacto real nos barrios e nos servizos municipais: limpeza, recollida de residuos ou mantemento do espazo público".

A este respecto a taxa "busca corrixir este desequilibrio e facer que quen utiliza eses servizos, aínda que sexa temporalmente, contribúa minimamente ao seu sostemento". Por iso, o 100% do recadado, detalla, "reverterase en melloras nos servizos públicos da Coruña".
 

En concreto, todas as persoas visitantes terán o deber de abonar a taxa e tamén aquelas que se aloxen en vivendas turísticas.

EXCEPCIÓNS

A normativa estipula exencións específicas nas que a recarga non se aplicará como menores de idade non emancipados, persoas cunha discapacidade superior ao 65%, deportistas federados en competición oficial, estancias por motivos médicos, persoas acollidas a programas sociais da UE ou motivadas por obras na vivenda habitual.
 

No caso dos cruceiros, estarán exentos da taxa até o ano 2026. Ademais, inclúe unha exención específica para o turismo de congresos.