A 'Plataforma Sanidade Galega con Palestina' anima a boicotear a Israel e marcas como Teva, Siemens ou Microsoft

Ao sur da Franxa de Gaza, os enfermos e feridos apíñanse ás portas do hospital Nasser en Jan Yunis. Alí, os poucos sanitarios que quedan esfórzanse en tratar de aliviar a homes, mulleres e nenos, a pesar de que case non teñen xa medicamentos, a comida escasea e non contan con suficientes recursos para atender a unha poboación que languidece baixo os cruentos ataques do exército de Israel. Ante estas imaxes que nos golpean a diario, un grupo de sanitarios galegos decidiron tomar cartas no asunto coa fundación da 'Plataforma Sanidade Galega con Palestina', un colectivo que pretende ser unha chamada á unidade fronte á barbarie que diezma ao pobo palestino. 

"DÍA A DÍA VAISE SUMANDO XENTE"

Álvaro Lamas é médico de familia na Guarda e un dos sanitarios presentes no acto de fundación desta organización que se constituíu oficialmente o pasado domingo 24 de setembro no Hotel Araguaney de Santiago, un lugar axeitado para tal evento posto que o empresario palestino Ghaleb Jaber é o que rexenta o icónico emprazamento santiagués. 

"Un compañeiro comentoume que un grupo de sanitarios estaban a se organizar en solidariedade con Palestina, de modo que me metín de cabeza", relata Lamas como xerme do que acabaría sendo esta organización que naceu despois dun par de reunións semipresenciales ao longo deste verán e que cristalizou o domingo coa presentación do manifesto onde marcan os obxectivos da plataforma. 

Nestes primeiros pasos a plataforma anima aos interesados a contactar a través do mail sanidadegalegaconpalestina@gmail.com ou a través das redes sociais nas súas contas de Instagram e Bluesky. De momento case un centenar de persoas compoñen os foros de Whatsapp e Telegram onde comezou a vertebrar a organización que "día a día vai sumando máis xente".

Entre as súas demandas está un cesamento do fogo inmediato, o fin do bloqueo á axuda humanitaria ou a "protección e apoio a todo o persoal sanitario e todas as estruturas necesarias para garantir a asistencia á sociedade gazatí". Desde a 'Plataforma Sanidade Galega con Palestina' din ter como referencia a outras entidades como Health Workers 4 Palestine e "outras plataformas locais na cuestión coa solidariedade con Palestina", a fin de unir naquelas reivindicacións que poidan compartir.
 

"Cremos que desde o noso ámbito e os principios que en teoría nos moven debemos facer extensivos eses principios a unha situación de calado histórico como é o xenocidio en Palestina, que nos están retransmitindo en directo e sobre o que non podemos facer coma se nada estivese a pasar", recalca Lamas.

MARCAS E BOICOT

Na súa posta de longo a organización sinalou que, entre as súas aspiracións, está a de lograr que se exclúan do catálogo de compras e prescricións os produtos do xigante farmacéutico israelí Teva, así como as súas marcas asociadas Tevagen, Davur, Belmac e Ratiopharm. O mesmo para outras empresas tecnolóxicas como Intell, Microsoft ou Siemens polos seus lazos con Israel ao participar no que consideran "políticas de apartheid sionista", "a venda de material bélico ao exercito israelí" ou firmas vinculadas a "ocupacioness ilegais en territorio palestino".

"Que esta información chegue ao público xeral sería o ideal", afirma Lamas, consciente de que moitas persoas poden ter un coñecemento "escaso" sobre a orixe de moitos medicamentos, pois tendemos "a quedarnos coa marca, coma se fose o nome do fármaco". 

"É o noso traballo facer ese labor de concienciación. Pero, sobre todo, como profesionais debemos concienciarnos entre nós para non empregar estes produtos e esixir ás autoridades que cancelen os contratos con estes provedores e difundilo cos nosos colegas das oficinas de farmacia. Todos estes paus fai falta tocalos para fortalecer a reivindicación de boicot contra Israel", detalla Lamas.

O mesmo ocorre co ámbito investigador ou científico, onde universidades como a USC ou a UDC, a pesar do seu compromiso de romper todas as relacións que mantiñan con Israel, aínda manteñen vixentes convenios co Estado sionista. Nesa liña, desde a plataforma son tallantes ao reclamar a "ruptura total e verificable" de relacións a aquelas "sociedades científicas, sanitarias, farmacéuticas e de xestión sanitaria en Galicia" con entidades homólogas israelís. 

"Non queremos que esa ruptura sexa só de palabra. Estamos a ver de maneira reiterada que moitas entidades fan xestos sobre o drama que se está vivindo, pero por detrás manteñen acordos cos genocidas", sanciona Lamas.

ENVÍO DE AXUDA "EN CANTO HAXA OCASIÓN"

Para un sanitario as imaxes que chegan a diario desde a Franxa poderían ser, se cabe, aínda máis descorazonadoras, ao ver tamén a tantos compañeiros de profesión absolutamente superados por unha situación sen precedentes. Con todo, Lamas asegura que "calquera ser humano cun mínimo de empatía tense que sentir removido dunha maneira especial". 

"Asistimos cada día a un defile de imaxes de nenos e nenas desnutridos até a morte por unha decisión dun Estado colonial. Vémolo todos os días, como vemos a francotiradores disparando contra sanitarios e os seus pacientes ou centros sanitarios en Gaza demolidos de maneira sistemática. Mentres, os nosos países colaboran con todo canto sucede. Isto tennos que levar a actuar", referenda Lamas.

O gran obxectivo, polo menos a medio prazo, sería poder levantar unha campaña de coa que mandar axuda humanitaria á Franxa, xa fose en forma de bens básicos ou medicamentos. Con todo, a organización é moi consciente das dificultades existentes nun momento de bloqueo total e cos corredores humanitarios ao amparo de ordénelas dos mandos de Israel.

"Gustaríanos poder concretar unha campaña destas características, pero nestes momentos carecemos da infraestrutura necesaria e tampouco se dan as condicións para poder facer chegar a axuda", lamenta Lamas, que abre a porta a colaborar "en canto xurda a oportunidade". 

O que si barallan é a convocatoria de mobilizacións e outros actos en diferentes centros sanitarios do país "para significarnos en contra do xenocidio e facernos ver como profesionais de saúde, así como tratar de convencer ás oficinas de farmacia e as institucións para que se comprometan co boicor contra este Estado genocida".