Sentenza aos asasinos de Samuel Luiz: 24 anos de prisión a Diego Montaña; 20 para Alejandro Freire e Kaio Amaral

Pasaron tres anos e medio desde que unha brutal malleira de madrugada acabou coa vida do hispanobrasileiro Samuel Luiz na Coruña. Desde o 3 de xullo de 2021 a familia de Samuel, o colectivo LGTBIQ e o conxunto da sociedade clamou xustiza contra este crime atroz que tivo o seu xuízo a finais de 2024 e sobre o que agora se pronunciou a Audiencia da Coruña, con condenas que suman case 75 anos de prisión.

PENA E INDEMNIZACIÓN

Diego Montaña foi o investigado sobre o que caeu a maior das penas, con 24 anos de cárcere ao considerar sobre el o agravante de discriminación por motivos de orientación sexual, un condicionante polo que a acusación particular que encabezou Ás Coruña (Asociación pola Liberdade Afectiva e Sexual) denunciaba que este era un crime de odio e polo que demandaban 25 anos de cárcere, o máximo legal neste caso e que non se alcanzou ao non considerar o xurado que se aplicase o agravante de ensañamiento. 

Alejandro Freire e Kaio Amaral foron condenados a 20 anos de prisión cada un, aínda que con diferentes consideracións. O arco punitivo de Alejandro vai desde os 15 aos 20 anos, mentres que o de Kaio contempla unha pena de 17 anos por asasinato e tres anos e medio máis por roubo con violencia, ao ser o que subtraeu o teléfono da vítima. No entanto, a súa intervención, a ollos do xurado, "non alcanza a entidade" da de Diego M.M. e Alejandro F.G. Alejandro Míguez, pola súa banda, foi condenado a 10 anos de cadea ao ser considerado cómplice do asasinato. 

A sentenza incorpora unha indemnización, en concepto de responsabilidade civil, que deberán abonar de maneira conxunta e solidaria Diego Montaña, Alejandro Freire e Kaio Amaral, mentres que Alejandro Míguez é sinalado no apartado da responsabilidade civil subsidiaria nunha porcentaxe do 30%. Así, deberán abonar aos pais e irmá de Samuel Luiz a cantidade de 303.284 euros. A sentenza non é firme e cabe recurso ante o TSXG, pero se decretou prisión provisional, comunicada e sen fianza, para o tres principais procesados. 

"ABSOLUTA INDIFERENZA"

A sentenza fai mención á sucesión de acontecementos que derivaron no asasinato a golpes de Samuel, xa que durante a malleira os participantes "asumiron o risco que levaba a súa acción" xa que resultou "deliberada" a "selección da cabeza como destino das agresións, a existencia dunha pluralidade de agresores sobre unha única vítima e a enorme violencia dos golpes e a forma en que se desenvolveu o ataque grupal".

"A absoluta indiferenza dos acusados cara á situación de Samuel cando cae inconsciente, ferido xa de morte, sen prestarlle axuda nin solicitala de terceiros, o abandono polos acusados do lugar, dispersar tranquilamente polas rúas adxacentes e o reagrupamiento posterior do grupo no parque Europa e no parque de San Diego", detalla o auto, onde se subliña que Samuel non tivo oportunidade algunha de defensa. 

De Diego Montaña o texto destaca "a súa actitude posterior para coa vítima e a súa familia, mostrando unha absoluta falta de empatía e unha crueldade que merecen un maior reproche penal", ademais da "animadversión cara á condición sexual homosexual que lle atribuíu" a Samuel e que desencadeou a agresión, mentres que de Alejandro Freire se recmar a súa "condición de partícipe destacado" ao atacar por detrás á vítima e pola "intensidade da súa intervención". 

O dano psicolóxico á familia de Samuel ou a falta de empatía e a crueldade mostrada son outros dos elementos que levaron ao tribunal a impor as penas das que se libra Catherine Silva, parella de Montaña xulgada e absolta durante o xuízo porque "primeiro, tratou de conter a Diego M.M.; despois, tratou de separalo e, aínda que continuou o traxecto da agresión, non o fixo con actos absolutamente necesarios nin auxiliares para o fatal desenlace", xuízos que extraen das declaracións, dos vídeos das cámaras de tráfico que filmaron a agresión e doutras cámas dispostas na zona.