De madrugada e con varios focos á vez, así actúan os incendiarios

A Xunta denunciou a "elevada actividade incendiaria" rexistrada nas madrugadas desta fin de semana, nas que se contabilizaron un total de 29 incendios declarados entre as dez da noite e as sete da mañá.

Segundo o goberno, 21 dos 29 incendios rexistrados de madrugada, cando os medios áereos non poden actuar, "quedaron reducidos a conatos", é dicir, non afectaron a máis dunha hectárea.

A continuación, o Executivo galego asegura que o tempo medio de reacción fronte a un lume situouse "ao redor dos 20 minutos". Ademais, denuncian que os incendios se declararon "con varios focos simultáneos en puntos próximos".

Así, puxo como exemplo o "paradigmático caso" do Concello de Agolada, onde "chegou a haber ata dez lumes en apenas 24 horas", dos que "catro quedaron en conatos" e "só un" superou as 15 hectáreas de superficie afectada.

AGRADECEMENTO AOS PROFESIONAIS

Deste xeito, a titular de Medio Rural agradeceu o traballo "a todos os profesionais que loitan contra os incendios forestais en Galicia, tanto ao persoal da propia Xunta como dos corpos e forzas de seguridade do Estado, Exército e Protección Civil".

Por último, tras emprazar a cidadanía a denunciar os incendiarios, lembra que a época de perigo alto de incendios se estende do 1 de xullo ao 30 de setembro, un tempo no que estarán despregados na comunidade "unhas 7.000 persoas para loitar contra o lume".

MÁIS DE 160 HECTÁREAS NUN PAR DE DÍAS

O incendio de Vilariño de Conso, iniciado na noite do sábado, continúa sen controlar este luns, aínda que a Xunta dáo por "estabilizado" desde o domingo.

O lume, que afecta a un cento de hectáreas calcinadas, comezou na parroquia de Castiñeira, e nas tarefas de extinción participaron cinco helicópteros, tres avións, 13 motobombas, 31 brigadas, 10 axentes e unha pa.

Por outra banda, ás 9,29 horas deste luns quedou controlado un incendio en Vilalba, na parroquia de Vilapedre, cunhas 24 hectáreas queimadas. Traballaron seis motobombas, oito brigadas, tres axentes e un técnico.

Así mesmo, na noite do domingo quedou extinguido o incendio de San Cristovo de Cea, na parroquia de Viña, que arrasou 38 hectáreas --30 de arboledo e oito de raso--. Na súa extinción traballaron 16 motobombas, 21 brigadas, 16 axentes, tres pas e un técnico.