A campaña a favor da prisión permanente revisable crece ata o millón e medio de firmas

A campaña pola 'Non derrogación da prisión permanente revisable" impulsada por Juan Carlos Quer, pai de Diana Quer, a través da plataforma da internet 'Change.org' superou as 1'5 millóns de firmas desde a súa posta en marcha.

Nun comunicado remitido por unha empresa de comunicación en nome de Juan Carlos Quer apúntase que "foron decenas os familiares de casos menos mediáticos nos que foron asasinados menores, algúns con delitos de agresión sexual, os que se puxeron en contacto directo coa plataforma para expresar o seu total apoio".

A iniciativa foi relanzada por Quer co respaldo doutras familias que sufriron a desaparición, agresión sexual ou asasinato dos seus fillos, encabezadas por Juan Cortés, Ruth Ortiz, Antonio del Castillo e Rocío Viéitez. Nos últimos días, tamén se uniron á campaña as familias de Sandra Palo, Yéremi Vargas e Naiara Briones.

"Non hai un día desde que empezamos a campaña en que non reciba algunha mensaxe doutras familias que sufriron un calvario igual, ou peor, que o noso, ofrecéndome todo o seu agarimo e absoluto respaldo á iniciativa", afirmou, a través deste comunicado, Juan Carlos Quer, que agradeceu as mostras de "xenerosidade e solidariedade".