​A nova normativa sobre xurros só pode ter excepcións o primeiro ano

A ministra de Agricultura e Pesca, Alimentación e Medio Ambiente, Isabel García Tejerina, referiuse este luns á nova normativa europea de xestión de xurros, unha normativa "inevitable" e manifestou que durante o primeiro ano de aplicación caben excepcións que deberán xustificar e poñer en marcha as comunidades autónomas.

Tal como recóllese no Real decreto 988/2017 sobre as condicións que as granxas deben cumprir para poder recibir axudas da Política Agraria Común no ano 2018, a regulación nacional establece a prohibición de que os xurros poidan ser aplicados en superficie por medio de cisternas tal como se vén practicando na actualidade.

Con todo, a norma establece que este abono orgánico se poida inxectar nas terras, o cal resulta "completamente inviable economicamente" para o modelo de explotacións gandeiras de Galicia, como denunciou Unións Agrarias.

García Tejerina manifestou que o Ministerio vai sacar unha convocatoria de axudas para a adquisición de maquinaria que permita cambiar a maneira de aplicar os xurros e lembrou que a realidade é que España supera os niveis de amoníaco e máis do 90% das emisións do mesmo proceden do sector agrario.

SACRIFICAR VACAS

"Somos un sector comprometido co medio ambiente e debemos facer as mellores practicas para evitar que pase por exemplo o que pasou en Holanda que se tiveron que sacrificar vacas por cuestións ambientais. Nós non queremos chegar a sacrificar vacas senón que temos que seguir crecendo pero iso require apostar polas mellores prácticas e as máis sustentables", indicou a ministra.

Así a titular do ramo insistiu en que "todos no sector deben ser conscientes de que é importante seguir crecendo, explotar o potencial de desenvolvemento pero necesariamente acompañado de prácticas máis sustentables".

GRANXAS "INVIABLES"

O sindicato Unións Agrarias solicitou a posta en marcha dunha mesa de traballo por parte da Consellería do Medio Rural, que estude solucións para atenuar o impacto previsto polas novas esixencias da PAC, referidas ao tratamento de xurros, e que fan "inviables" as granxas galegas.

O sector gandeiro galego produce cada ano uns 15 millóns de metros cúbicos de xurro que se usa como fertilizante base nas explotacións gandeiras, polo que "de non instruír un regulamento corrector, o medio rural galego tería ademais dun gravísimo problema económico, veríase abocado a un colapso ambiental pola imposibilidade de tratar os residuos nas explotacións".

A XUNTA PIDE EXCEPCIÓNS

A Consellería do Medio Rural trasladarálle ao Ministerio de Agricultura e Pesca a "necesidade de implantar un período de transición" e diferentes "excepcionalidades" para Galicia na aplicación da normativa sobre xurros nas superficies agrícolas.

Ademais, Medio Rural elabora diferentes informes para ver cantas explotacións galegas estarían afectadas, posto que as pequenas quedan excluídas pola norma, e poder decidir os pasos a seguir, segundo explica no comunicado.