Cifras récord nos aeroportos galegos, que superan todos o millón de pasaxeiros
Os 4.851.762 pasaxeiros de 2017 superan o máximo rexistrado en 2007.
Os aeroportos galegos lograron cifras "récord" en tráfico de viaxeiros o pasado 2017, ao rexistrar 4.851.762 pasaxeiros e bater a marca "histórica" de 2007. Estes datos supoñen, ademais, un incremento de 323.725 viaxeiros respecto de 2016.
Segundo os datos de AENA, Alvedro rexistrou en 2017 un total de 1.141.242 pasaxeiros, un 7,3% máis, colleitando o terceiro mellor ano da súa historia en tráfico de pasaxeiros.
Destes viaxeiros, 1.131.326 utilizaron voos comerciais (un 7,4% máis), 1.005.634 en traxectos nacionais e 125.692 en traxectos internacionais.
LAVACOLLA
Pola súa banda, Santiago rexistrou en 2017 un total de 2.644.925 pasaxeiros, un 5,3% máis que en 2016, o que o converte nun ano récord na historia do aeroporto.
Do total de pasaxeiros comerciais (2.639.920), 2.012.440 realizaron voos nacionais (un 2,4% máis que en 2016) e 627.480 internacionais (un 15,7% máis).
PEINADOR
Finalmente, tamén Peinador superou o millón, rexistrando 1.065.595 pasaxeiros en 2017, un 11,7% máis que en 2016. Dos comerciais (1.064.151), 930.953 realizaron traxectos nacionais (un 4,8% máis) e 133.198 traxectos internacionais (un 104,1% máis).
En canto ás operacións, en Peinador rexistráronse, ao longo de 2017, 12.479 voos (un 8% máis que en 2016), dos cales 10.204 foron voos comerciais (8,9% máis).
Escribe o teu comentario