Rajoy continúa a súa xira de inauguracións na AP-9 entre berros de "estafa"

|

Ap9 inauguracion santiagoAs autoridades destaparon un cartel.


O presidente do Goberno presidiu o acto de posta en servizo das obras de ampliación da autoestrada AP-9 ao seu paso por Santiago. Son 8,5 quilómetros nos que o investimento ascende a 84,8 millóns de euros contando co enlace de Sigüeiro, que foi inaugurado xa en xullo de 2017.


O obxectivo, segundo destacou Rajoy este mércores no seu discurso, é "resolver o colo de botella" que se producía neste punto, na circunvalación da capital galega, que soporta un tráfico diario duns 42.000 vehículos con picos de máis de 52.000.


Rajoy, que, entre outras autoridades, estivo acompañado por Feijóo, o ministro de Fomento, Íñigo de la Serna, e a súa antecesora no cargo e actual presidenta do Congreso, Ana Pastor, reivindicou a "mellora" da seguridade que supoñen as obras.


"UN ANTES E UN DESPOIS"


Xunto a el, previamente, o titular da Xunta asegurou que a cidade "queda mellor preparada" ante o aumento "masivo" de visitantes que espera para "dentro duns meses" e "de forma continuada ata 2021", cando se celebrará o próximo Xacobeo.


Para Núñez Feijóo, de feito, esta ampliación, unha "infraestrutura estratéxica", xunto á da ponte de Rande, hai catro días, supoñerá "un antes e un despois" para a "conectividade" de Galicia.


Así, no medio da polémica pola subida das peaxes, dixo que as obras futuras non levarán "aparellado un incremento da peaxe", segundo "o compromiso do Goberno".


Ap9 bng protesta peaxes


CAMPAÑA CONTRA AS PEAXES


Este acto, o segundo de Rajoy na AP-9 en poucos días, recibiu a campaña do BNG contra a subida das peaxes e pola transferencia a Galicia cun acto de protesta.


Varios membros do Bloque concentráronse do outro lado da autoestrada mentres as autoridades destapaban un cartel da AP-9.


Neses momentos, oíronse berros de "estafa", entre outros cánticos en rexeitamento ao incremento de peaxes que acomete este ano a concesionaria da vía, Audasa.


Este acto de protesta é "simbólico", segundo destacan os nacionalistas a través dun comunicado, no que lembran que é similar ao que levaron a cabo hai catro días na apertura da ampliación da ponte de Rande.


O Bloque, como anunciou a portavoz nacional, Ana Pontón, na presentación desta campaña en Pontevedra con alcaldes e cargos municipais, "nin tira a toalla, nin está disposto a cruzarse de brazos" ante o "vergoñoso" veto á transferencia, nin ante a nova subida das tarifas dunhas peaxes que constitúen, ao seu xuízo, "unha estafa legalizada".


A AMPLIACIÓN DA AP-9


No tramo Santiago norte-Santiago sur, que serve como circunvalación da capital de Galicia durante 8,5 quilómetros de lonxitude, ampliouse cun ou dous carriles máis por sentido, en función da zona.


Así mesmo, executouse un ramal de conexión directo da AP-9 sentido A Coruña coa autovía Santiago-Lugo (A-54) evitando que os vehículos que realizan este movemento teñan que circular pola ligazón de Santiago norte e a SC-20.


relacionada O BNG anuncia o inicio de “a batalla de Rande” pola xestión da AP-9
relacionada En Marea leva ante o Tribunal Constitucional o veto ao debate da trasferencia da AP-9
relacionada O BNG inicia a súa ofensiva contra as peaxes da AP-9

Sen comentarios

Escribe o teu comentario




Non está permitido verter comentarios contrarios á lei. Nos reservamos o dereito a eliminar os comentarios que consideremos fora de tema.

Galiciapress
Praza da Quintana, 3; 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS OS DEREITOS. EDITADO POR POMBA PRESS,S.L.
Aviso legal Cookies Consello editorial
Powered by Bigpress