Maxia para todas as idades nos barrios da cidade e o rural ferrolán

As entradas están esgotadas en Canido e Caranza. Foto: @portamaxica

Ferrol acolle estes días un festival de maxia que ofrece espectáculos para todas as idades. Sobre iso, o concelleiro de Cultura de Ferrol, Suso Basterrechea (FeC), asegurou que a proposta 'Porta Máxica - I Festival de Ilusionismo de Ferrol' está chamada a ser todo "un éxito" e que boa mostra destas previsións é que "as prazas dispoñibles están esgotadas nos barrios urbanos, como son Canido e Caranza, e a piques de se acabar na zona rural, como é Esmelle e Covas".

Estas manifestacións realizounas o edil ferrolán na inauguración oficial desta proposta programada desde o seu departamento, onde compareceu ante os medios de comunicación acompañado polo mozo meigo local Martín Varela, director artístico do festival e tamén impulsor desta iniciativa.

Basterrechea destacou que o obxectivo é que este festival se desenvolva durante varias xornadas, "entre o inicio do novo ano e unha das noites máis máxicas do ano, como é a da chegada dos Reis Magos". Busca ofrecer unha "arte que ten unha gran aceptación, como é o da maxia".

Pola súa banda, Martín Varela incidiu en que "este festival está especialmente pensado para Ferrol", como "unha porta máxica" na que non se saiba "se chegan os magos" ou é un mesmo o que entra.

O mozo mago galego destacou que "durante tres xornadas en Ferrol vai ter moita maxia, con magos chegados desde Rusia, Arxentina e de todo o Estado español, como é o caso de Pablo Cánovas, desde Córdoba".

PARA TODOS OS PÚBLICOS

Martín Varela tamén destacou que esta proposta se adapta "para todos os públicos, xa que se trata de representar todas as disciplinas da maxia, con artistas consagrados e outros que están a comezar a súa carreira e tamén con espectáculos para todo tipo de públicos e idades".

Así, destacou os talleres de maxia para "nenos a partir dos seis anos, ademais dos espectáculos gratuítos na Biblioteca Municipal e no Centro Cívico de Caranza, e as propias galas de maxia".

Entre estas últimas, resaltou a proposta que terá lugar este mércores, 3 de xaneiro, no Teatro Jofre, a partir das 19,30 horas, e que lembrará aos magos "Lorc & Julie" que, segundo o artista ferrolán, servirá "para honrar á parella de magos máis importante que deu Ferrol e que foi o maior referente no pasado".

O xoves 4 de xaneiro haberá tamén outra gala neste mesmo escenario, con dúas funcións, ás 18,00 e 20,30 horas, que servirá ademais para pechar a primeira edición deste festival, e na que participarán Pablo Cánovas, Dúo Kybalion, Tecnomagos, Kayto e Tá na manga. Será presentada polo propio Martín Varela.